«Калі набыў $20 па курсе 3,3 — і цяпер ты паспяховы інвестар»: як беларусы рэагуюць на скачкі валют
Пакуль Рыгор Азаронак дэманстратыўна паліць даляр, мы паглядзелі, што кажуць звычайныя беларусы ў тыктоку наконт рэкордаў даляра і еўра.
Сярод першых на сабе наступствы рэкордаў даляра і еўра адчулі тыя, хто здымае кватэры.
— Мы здымаем кватэру і як шмат хто плацім у далярах, — распавяла ў тыктоку адна дзяўчына. — Я за суткі проста ашалела. Вось у банку, у якім я абслугоўваюся, амаль на 10 капеек за суткі падняўся курс. І яшчэ ранкам ён быў 3,55, здаецца. Цяпер, праз некалькі гадзін, я гляджу — 3,599. Прыходжу ў банк, а мне кажуць: «Даляраў няма». А курс з кожнай гадзінай усё расце і расце.
Яна хвалюецца, што цяпер за арэндную кватэру ёй прыйдзецца плаціць на 100 рублёў больш, чым месяц таму.
Пра дзіўны выпадак у адным з беларускіх банкаў распавёў іншы блогер.
— Я сёння здаў 100 даляраў. На касах нікога не было. Пасля мяне — ну я стаю там, буклеты чытаю — падыходзіць чалавек і кажа, што хоча купіць 100 даляраў. А яму адказваюць: «У нас няма».
Філасофскае пытанне: «Што рабіць?» людзей хвалюе:
— Хто бачыў, як вырас еўра і даляр? Што рабіць? Вы бачылі, якія чэргі ў банках? Валюты ўжо практычна няма, — хвалюецца блогерка.
Яна сцвярджае, што тыдзень-паўтара таму еўра куплялі па 3,53 рубля, а сёння пабачыла ў Прыёрбанку па 3,923.
— І я не ведаю, што рабіць. Мне купляць цяпер ці пачакаць? Памятаеце, як у 2021 годзе — спачатку ўсё вырасла да 4, а потым рэзка ўсё ўпала. І людзі адразу ўсё скупілі, а потым шмат страцілі на розніцы курсаў.
Яшчэ адна блогерка не разумее агульных настрояў і сцвярджае, што знайсці даляры не вельмі складана. Жанчына цяпер робіць рамонт у кватэры і кажа, што рабочыя самі просяць разлічваюцца з імі ў беларускіх рублях, а не ў замежнай валюце. Адзінае, што яе хвалюе — бацькі ў школе яе дзіцяці вырашылі збіраць на выпускны таксама ў беларускіх рублях.
— З выпускным было пытанне. Падлічылі суму ў далярах, але вырашылі ўсё здаваць у рублях. Але ж да чэрвеня курс, хутчэй за ўсё, зменіцца і прыйдзецца нам яшчэ даплачваць. А прапаноўвалі мы здаць далярамі.
Маці, якая знаходзіцца ў дэкрэтным адпачынку, паспрабавала іранізаваць на гэтую тэму, але атрымалася даволі сумна.
— Пакуль усе там панікуюць, што даляр падняўся на 3 капейкі, я вам пакажу, чаму панікую я. У адзін момант усё заканчваецца: шампунь, гель для душа, маска для валасоў, зубная паста, нават кавалак мыла. Ну вы разумееце.
Маладая жанчына дэманструе амаль пустыя слоічкі, засохлую туш.
— Вы разумееце, што ўсё заканчваецца, усё. А вы мне там пра нейкія даляры.
Але ў подпісе да відэа яна піша, што навіна пра даляр жудасная, асабліва для тых, хто здымае кватэру.
Канечне, беларусаў цяжка здзівіць пустымі абменнікамі і скокамі валютных курсах. Усё ж за 30 гадоў такой любімай прапагандыстамі «стабільнасці» такія сітуацыя здараліся не аднойчы. Таму жартаў у тыктоку таксама хапае.
— Калі набыў 20 даляраў па курсе 3,3 рублі — і цяпер ты паспяховы інвестар, — пажартаваў адзін з блогераў.
Сваё жартаўлівае відэа запісаў і гумарыстычны тыкток-акаўнт «Баба Галя руліць». Над ім працуе беларуская каманда, якая нядаўна запусціла і YouTube-канал «Лукашолкі».
Дзве пераапранутыя бабулі ў кадры распавядаюць пра падзеі ў Беларусі з гумарам і сатырай, імкнучыся прыцягнуць увагу аўдыторыі 50+. Тэму са скачкамі курсаў валют яны ўжо таксама абмеркавалі.
Каментары