«Людзі крычалі з вокнаў: «Выратуйце нас», бо ўнутры быў моцны дым.
У ноч на аўторак у гатэлі на гарналыжным курорце Карталкая ў турэцкай правінцыі Балу ўспыхнуў пажар. Ён хутка ахапіў увесь будынак. Колькасць загінулых дасягнула ўжо 76 чалавек, паведаміў міністр унутраных спраў Алі Ерлікая, піша Бі-бі-сі.
Раней ён жа паведаміў пра 51 пацярпелага. Частка пацярпелых знаходзіцца ў цяжкім стане.
Пажар пачаўся ў 12-павярховым (паводле іншых звестак, у 11-павярховым) гатэлі Grand Kartal у 03:27 па мясцовым часе. Цяпер у Турцыі пачаліся агульнанацыянальныя двухтыднёвыя школьныя канікулы, і гэта разгар лыжнага сезона, таму ў гатэлі знаходзілася 234 пастаяльцы.
Губернатар Балу Абдулазіз Айдын паведаміў, што, паводле папярэдніх даных, пажар узнік у рэстараннай зоне на чацвёртым паверсе гатэля і распаўсюдзіўся на верхнія паверхі. Гатэль знаходзіцца даволі далёка ад цэнтра Балу.
У спалучэнні з марозным надвор'ем гэта прывяло да таго, што пажарныя дабіраліся да месца больш за гадзіну.
Ратавальныя работы працягваліся і раніцай, і тады ж з’явіліся паведамленні пра тое, што ратавальнікі ўсё яшчэ спрабуюць дабрацца да некаторых частак гатэля.
Паводле даных турэцкіх СМІ, як мінімум два чалавекі загінулі, выскокваючы з вокнаў гатэля. Некаторыя спрабавалі выбрацца з вокнаў па вяроўках, зробленых з пасцельнай бялізны.
Інструктар па лыжах Неджмі Кепчэтутан распавёў турэцкаму тэлебачанню, што яму ўдалося выратавацца, бо ён добра ведаў гатэль, у той час як гасцям, незнаёмым з яго планіроўкай, пашанцавала менш.
«Людзі крычалі з вокнаў: «Выратуйце нас», бо ўнутры быў моцны дым. Мы выцягнулі 20-25 чалавек», — распавёў ён тэлеканалу NTV.
Прычына пажару пакуль невядомая. Міністр юстыцыі Йылмаз Тунч паведаміў, што да расследавання далучылася пракуратура. Прэзідэнт Турцыі Рэджэп Таіп Эрдаган выказаў спачуванні сем’ям загінулых.
Цяпер чытаюць
У СІЗА КДБ апынуўся Мікалай Цырто, фігурант старой справы Беларусбанка. Другі раз — за палітыку1
Каментары