Віцебскі ідэолаг у прапагандысцкім запале заступіўся за сімвал, за які не ідэолагаў сурова пераследуюць
У чарговым выпуску прапагандысцкага відэаблога «Вести не молчат» галоўны спецыяліст ідэалагічнай работы і па справах моладзі Віцебскага аблвыканкама Святаслаў Міхайлаў узяўся крытыкаваць пашпарт Новай Беларусі і дзеля гэтай «святой справы» нават пазітыўна выказаўся пра нацыянальны сімвал, за сімпатыі да якога звычайных людзей строга караюць, заўважыла «Віцебская вясна».
Міхайлаў у сваім спічы папракнуў дэпутатаў літоўскага Сейма за жаданне іх «прысвоіць» сімвал «Пагоні». Маўляў, гэта несумненная гістарычная каштоўнасць для Беларусі.
У якасці прыкладу ідэолаг прыгадаў, што выява пагоні ёсць на сцягу Віцебскай вобласці і на гербах многіх гарадоў Віцебшчыны.
«Дык, можа, літоўскія палітыкі і нам прэтэнзіі прад'явяць, што мы іхні герб выкарыстоўваем?», — грозна запытаўся Святаслаў Міхайлаў.
Але пакуль да гэтага дабраліся літоўскія палітыкі, за выкарыстанне герба «Пагоні» ў Беларусі даўно не на словах, а на справе пераследуюць людзей лукашэнкаўскія сілавікі. Выпадкаў, калі адным з пунктаў ці нават адзіным пунктам абвінавачання з'яўлялася выкарыстанне «Пагоні», было так шмат, што сёння людзі ўнутры краіны баяцца не толькі адкрыта дэманстраваць старажытны герб, але і трымаць яго на адкрытым месцы дома ці нават у тэлефоне.
Так, напрыклад, пінскага праваабаронцу Алеся Рамановіча ў свой час аштрафавалі за значок з «Пагоняй» на 3840 рублёў. Пры гэтым, як ён сам расказваў:
«Я прынёс на суд скрыншоты, ксеракопіі, якія пацвярджалі, што герб Пагоня — гісторыка-культурная каштоўнасць. А ў адказ суддзя запыталася: «А вы ведалі, што Пагоня выкарыстоўваецца як сімвал пратэсту?»
І нічога даказаць у такіх выпадках немагчыма. Аднак жа прапагандысты пры гэтым часам, калі гэта ім па нейкіх прычынах выгадна, могуць крывадушна паразважаць пра «Пагоню» як гістарычны сімвал — прыклад Святаслава Міхайлава далёка не першы.
Віцебскі ідэолаг Святаслаў Міхайлаў стаў відэаблогерам увосень мінулага года: ён стварыў свой відэаблог, назваўшы яго даволі няўцямна — «Свята место». Але праз пару месяцаў свой канал на відэахостынгу YouTube яму дала абласная газета «Витебские вести», і з таго часу відэаканал Святаслава Міхайлава называецца «Вести не молчат». У ім ён спрабуе пераконваць сваіх гледачоў у тым, што беларусам у Еўропе жывецца кепска, што дэмакратычныя лідары іх падманваюць, а сапраўдны рай на зямлі — у цяперашняй Беларусі.
Цяпер чытаюць
На канверце Ціханоўскай напісана «Медведю О.В.» Што гэта за чалавек?23
Каментары