Дзяржаўнае тэлебачанне Ірана раніцай у аўторак паведаміла пра пачатак рэжыму спынення агню ў ваенным канфлікце з Ізраілем.
Міністр замежных спраў Ірана Абас Арагчы на сваёй старонцы ў сацыяльнай сетцы X абвясціў пра тое, што баявыя дзеянні іранскай арміі спынены а 4-й раніцы па мясцовым часе.
Некалькі гадзін раней прэзідэнт ЗША Дональд Трамп паведаміў пра тое, што паміж Ізраілем і Іранам была дасягнута дамоўленасць «аб поўным спыненні агню». Прэзідэнт Трамп дадаў, што пагадненне ўступіць у сілу ў бліжэйшыя гадзіны пасля таго, як абодва бакі завершаць раней распачатыя ваенныя аперацыі, нагадвае Расійская служба Радыё Свабода.
Раніцай у аўторак прадстаўнік арміі абароны Ізраіля (ЦАХАЛ) адмовіўся каментаваць паведамленні пра спыненне агню ў той час, як Ізраіль працягваў наносіць паветраныя ўдары па цэлях на тэрыторыі Ірана.
Як паведамляе New York Times, дамоўленасць пра спыненне агню была дасягнута пры пасярэдніцтве Катара, які перадаў Ірану амерыканскую прапанову пра перамір’е.
Днём раней ізраільскія прадстаўнікі далі зразумець пра магчымасць хуткага завяршэння баявых дзеянняў супраць Ірана. У нядзелю прэм’ер-міністр Ізраіля Біньямін Нэтаньяху заявіў пра тое, што Ізраіль «вельмі-вельмі блізкі» да дасягнення мэт ваеннай аперацыі.
Цяпер чытаюць
На перадсмяротным відэа з калоніі насамрэч быў не Вітольд Ашурак. З'явіліся новыя падрабязнасці смерці палітвязня26
Каментары