Мужчына ў Мінску разграміў 18 прыпаркаваных машын — каб іх кіроўцы хадзілі пешшу і не траплялі ў аварыі
Кобрынец прыехаў у сталіцу працаваць дворнікам, але яго звольнілі за п’янства. А потым яму прыйшла ў галаву «геніяльная» ідэя.
Жыхар Кобрына прыехаў у Мінск, каб падзарабіць. Мужчына ўладкаваўся дворнікам, але працаваў нядоўга: праз пару месяцаў яго звольнілі за п'янку.
Дадому 58-гадовы мужчына не паехаў, замест гэтага вырашыў жыць на вуліцы і жабраваць. Амаль усё мінулае лета кобрынец начаваў у сталічных пад'ездах, пішуць «Мінск-Навіны».
Аднойчы ён перабраў з алкаголем, і яму ў галаву прыйшла дзіўная ідэя. Ён захацеў выратаваць кіроўцаў ад аварый. Мужчына адправіўся на прагулку па дварах вуліц Олешава, Усходняй, Ламаносава і Якуба Коласа і пачаў разбіваць прыпаркаваныя машыны. Логіка ў яго была такая: людзі ездзяць на аўто і трапляюць у аварыі, а калі машыны разбіць, то гэта выратуе кіроўцаў ад ДТЗ.
Мужчына падышоў да справы з усёй адказнасцю. Ён кідаў у машыны цэглу, тратуарную плітку, кветкавыя кашпо, біў па кузавах нагамі і рукамі, вырываў з газонаў штыры з таблічкамі, а пасля біў імі па транспартных сродках, выломваў люстэркі, а ў адзін з аўтамабіляў шпурнуў самакат.
Усяго кобрынец паспеў пашкодзіць 18 машын і нанёс шкоду на 28,5 тысячы рублёў.
Суд «шляхетны» намер мужчыны не ацаніў і прызначыў яму тры гады калоніі ўзмоцненага рэжыму, а таксама прымусовае лячэнне ад алкагалізму. Яшчэ яму прыйдзецца нейкім чынам кампенсаваць страты ўладальнікам аўтамабіляў.
Каментары