У ЗША ў аварыю трапіў грузавік з лабараторнымі малпамі. Частка жывёл разбеглася
У амерыканскім штаце Місісіпі адбылася надзвычайная падзея — на аўтамагістралі трапіў ў аварыю грузавік, які перавозіў лабараторных малпаў. Паводле афіцыйных паведамленняў, гэта былі макакі-рэзусы — від малпаў, якіх часта выкарыстоўваюць у навуковых даследаваннях.
Пасля сутыкнення грузавіка некалькі клетак з жывёламі пашкодзіліся, дзякуючы чаму частка малпаў выбралася на волю.
Кіроўца машыны паведаміў паліцыі, што гэтыя жывёлы могуць быць небяспечнымі, бо яны нібыта заражаныя інфекцыйнымі захворваннямі — гепатытам С, герпесам і COVID-19.
На гэтай падставе паліцыя папярэдзіла жыхароў рэгіёну, каб яны не падыходзілі да малпаў і не спрабавалі іх лавіць. Тым, хто ўдзельнічаў у пошуках, выдалі сродкі індывідуальнай абароны.
Аднак прадстаўнікі Універсітэта Тулейн (штат Луізіяна), які займаецца даследаваннямі на жывёлах, абверглі заявы кіроўцы. Яны патлумачылі, што гэтыя малпы не інфікаваныя ніякімі хваробамі і не належаць універсітэту — іх проста перавозілі па дамове з іншай навуковай арганізацыяй.
Нягледзячы на гэта, улады вырашылі дзейнічаць асцярожна. Паліцыя акруга Джэспер распачала шырокамаштабную аперацыю па пошуку і знішчэнні ўцекачоў. Паводле апошніх звестак, большасць малпаў ужо забілі, але тры з іх яшчэ заставаліся на волі. Дакладная колькасць жывёл, што знаходзіліся ў грузавіку, пакуль не ўстаноўленая.
Аварыя адбылася 28 кастрычніка, але абставіны здарэння ўсё яшчэ высвятляюцца. Паводле слоў прадстаўнікоў паліцыі, дарога была слізкай, таму, верагодна, кіроўца не справіўся з кіраваннем.
Гэта ўжо не першы выпадак падобнага характару ў ЗША. Раней у штаце Вашынгтон перакуліўся грузавік з вуллямі, у выніку чаго на волю трапілі каля 250 мільёнаў пчол, што таксама прывяло да панікі і вялікіх цяжкасцяў для мясцовых жыхароў.
Каментары