Случакі абураюцца: школу абгарадзілі так, што для паходу ў краму трэба рабіць ладнага кругаля
Жыхары вуліцы Кананавіча ў Слуцку вельмі незадаволеныя новай агароджай, якую паставілі вакол сярэдняй школы №6. Цяпер іх шлях да гандлёвага цэнтра «Маяк» і ў цэнтр горада стаў значна даўжэйшым, асабліва для тых дамоў, што знаходзяцца ў канцы тупіка, а таксама для пажылых людзей і інвалідаў, піша мясцовае выданне SlutskGorod.
Дачка адной з жыхарак расказала, што ў апошнім доме жыве чалавек з інваліднасцю першай групы, да якога нават хуткая дапамога не заўсёды можа даехаць. Раней людзі, ідучы да крамы, маглі прайсці ўздоўж школы, цяпер жа ім даводзіцца абыходзіць абгароджаную тэрыторыю па вялікім крузе, да таго ж каля 400 метраў ісці па гразі.
Абедзве сцежкі, што былі раней, цяпер перакрытыя — існуе толькі праход ад моста праз рэчку Бычок і ад пяціпавярховак па вуліцы Парыжскай Камуны.
Жыхары разумеюць, што школы па новых нормах павінны быць абгароджаныя, але іх абурыла тое, што ніхто не параіўся з імі перад будаўніцтвам агароджы і не ўлічыў зручнасць пешаходнага руху, асабліва для пажылых людзей.
Адна з жыхарак паведаміла, што яны звярталіся ў райвыканкам, але ім адказалі, што зрабіць дарожку ўздоўж рэчкі немагчыма з-за водахоўнай зоны.
У выніку 35 жыхароў вуліцы падпісалі калектыўны зварот да старшыні раённага выканаўчага камітэта з просьбай зрабіць праход уздоўж агароджы школы з асвятленнем, каб магчы зручна выходзіць у горад. У звароце адзначаецца, што ранейшыя спробы дамовіцца з дырэктарам школы і райвыканкамам вынікаў не далі.
У Слуцкім раёне невядомыя выкапалі туі з могілак. І гэта не адзіная для іх праблема
«Выклікайце санітараў!» У Слуцку пенсіянеркі апантана ваююць з дзіцячай пляцоўкай
У Слуцку камунальнікі не прыбіраюць яму на дарозе вакол люка, бо люк у прыватнай уласнасці
Амаль Неапаль. У Слуцку сметніцы перапоўненыя, але іх не прыбіраюць
Брудныя сметніцы ў цэнтры Слуцка нечакана прыбралі
Каментары