У Мінску зрабілі выставу да юбілею Ясеніна і паклікалі на адкрыццё Бязрукава
Выстава, прысвечаная 130‑гадоваму юбілею расійскага паэта Сяргея Ясеніна, адкрылася ў Нацыянальным мастацкім музеі Беларусі ў Мінску. У экспазіцыі прадстаўлена больш за 100 твораў жывапісу, графікі і скульптуры сучасных расійскіх мастакоў на тэму жыцця і творчасці Ясеніна, піша БелТА.
Асноўная частка твораў на выставу паступіла з мастацкага фонду музея Ясеніна ў Воронежы, які папаўняецца дзякуючы рэгулярным «Ясенінскім пленэрам», што праводзяцца з 2012 года ў родным селе паэта Канстанцінава ў Разанскай вобласці.
Расійскі акцёр Сяргей Бязрукаў, які ў свой час сыграў галоўную ролю ў мастацкім фільме пра Ясеніна і быў запрошаны на адкрыццё выставы ў Мінску, адзначыў, што частка «ясенінскай душы» цяпер прысутнічае ў сталіцы Беларусі і параіў наведаць экспазіцыю для натхнення.
Артыст падкрэсліў, што ён рады вялікай колькасці прыхільнікаў Ясеніна ў Мінску і адзначыў, што «два народы аб'ядноўвае любоў да радзімы і глыбіннае веданне роднай мовы».
У лістападзе мінулага года Сяргей Бязрукаў з-за сваёй любові да Ясеніна і не надта вялікай павагі да адметнасці іншых народаў трапіў у скандальную сітуацыю ва Узбекістане.
У інтэрв’ю артыст сам расказваў гісторыю, як падчас знаходжання ў Ташкенце яму падарылі кветкі і ён вырашыў ноччу ўскласці іх на магілу Таццяны Ясенінай — дачкі паэта, якая падчас Другой сусветнай вайны апынулася ва Узбекістане і пражыла там паўстагоддзя да сваёй смерці. Бязрукаў адзначыў, што на могілках мясцовыя работнікі дапамагалі яму знайсці дарогу да магілы, хоць гаварылі па-руску з цяжкасцю. Пасля ён стаў, пераказваючы, парадзіраваць акцэнт, чым выклікаў абурэнне ва ўзбекаў.
Зорка Купалаўскага Павел Харланчук пераехаў у Маскву і працуе ў тэатры Сяргея Бязрукава
Былы купалавец Харланчук жыве ў Расіі і здымаецца ў «патрыятычных» серыялах
Качанава: З задавальненнем пачытала Захара Прылепіна. А з любімага — Пушкін, Талстой і праваслаўная літаратура
Дзяржаўны радыёканал «Культура» паказаў нейрасеткавыя партрэты «класікаў айчыннай літаратуры». Паспрабуйце адшукаць сярод іх беларусаў
Цяпер чытаюць
Азараў моцна пакрыўдзіўся на словы «псеўдалідаркі Ціханоўскай», што яго План Перамога быў памылкай31
Каментары