Праваабаронцы мяркуюць, што з палітвязня робяць злоснага парушальніка, каб не было шанцаў на амністыю.
На палітвязня Алеся Бяляцкага ўскладзена забарона на атрыманне прадуктовай перадачы і на кароткатэміновае спатканне з жонкай.
Пра чарговае спагнанне за парушэнне «правілаў паводзінаў асуджаных», якое, нібыта ўчыніў Алесь Бяляцкі, ягоная жонка Наталля Пінчук даведалася з ліста Алеся.
«Пасля 15 жніўня мы збіраліся ехаць да Алеся на кароткатэрміновае спатканне. Зараз гэтае спатканне ўжо не адбудзецца, бо ў сваёй паштоўцы ён напісаў:
"Толькі што склалі чарговы акт за вынас харчоў са сталоўкі — нёс сваю скібку хлеба з вячэры".І за гэта яго пазбавілі магчымасці чарговай прадуктовай перадачы і кароткатэрміновага спаткання. Улічваючы папярэднія спагнанні, ён пазбаўлены доўгатэрміновага спаткання ў верасні і вось зараз — кароткатэрміновага ў жніўні. Выглядае так, што на яго мэтанакіравана робіцца ўціск, і гэта сведчыць таксама пра тое, што за ім пільна сочаць і пра ўсё дакладваюць адміністрацыі».
Праваабаронца Валянцін Стэфановіч мяркуе, што пільны кантроль за Алесем Бяляцкім мае на мэце пазбавіць яго магчымасьці датэрміновага вызвалення.
«Па-першае, была пастаўленая задача зрабіць яго злосным парушальнікам, каб на яго не распаўсюдзіўся закон аб амністыі. Бо ў гэтым выпадку ягоны тэрмін зняволення быў бы скарочаны на адзін год. Ну, а па-другое, я не выключаю, што на яго ціснуць дзеля таго, каб Алесь напісаў прашэнне аб памілаванні. Бо такі ціск на палітвязняў чыніцца, і нам гэта дакладна вядома.
І вядома, што на сёння двое палітвязняў напісалі такое прашэнне — гэта Сырамалотаў, які зняволены па справе анархістаў, і Сяргей Каваленка — прычым напісалі даўно.Але лёс гэтых прашэнняў невядомы — цалкам паўтараецца сітуацыя з Бандарэнкам і Саннікавым, якія напісалі прашэнні шмат раней, чым іх вызвалілі. І таму, натуральна, што гэтае пакаранне з'яўляецца вынікам перадузятага стаўлення да Алеся Бяляцкага з боку адміністрацыі бабруйскай калоніі».
Алесь Бяляцкі, нагадаем, асуджаны на 4,5 года зняволення.
Цяпер чытаюць
З 1 ліпеня некаторыя тавары на касах самаабслугоўвання трэба будзе аплачваць па-новаму1
Каментары