Былы функцыянер БРСМ: Я дагэтуль адчуваю асабістую віну

У апошні час Лукашэнка заяўляе аб неабходнасці прыходу ва ўладныя структуры ўсіх узроўняў новых маладых кадраў.

З аднаго боку — гэта абсалютна відавочна і неабходна для развіцця не толькі дзяржавы, а нават самага невялікага прадпрыемства.

З іншага боку ўзнікае пытанне — адкуль гэтыя «кадры» з’явяцца, і ці змогуць яны сапраўды эфектыўна кіраваць?

Адразу хачу сказаць, што ніякага аптымізму ад гэтай навіны асабіста ў мяне не з’явілася.

Відавочна, што ва ўладу прыйдуць «правераныя» асобы, прафесійныя веды і здольнасці якіх выклікаюць вялікі сумнеў. Відавочна і тое, што большая частка «новых кадраў» прайшла праз «фільтр» БРСМ (БПСМ).

Мне, хто ў свой час працаваў у гэтай арганізацыі, прайшоў шлях ад другога сакратара райкама да кіраўніка аддзела абкама, а потым і ЦК БПСМ, добра вядомы гэты «гадавальнік» кадраў для лукашэнкаўскай улады.

Я не кажу пра простых членаў БРСМ, пераважная большасць якіх прыйшла ў арганізацыю па прымусу, каб не страціць месца вучобы або працы, каб атрымаць месца ў студэнцкім «інтэрнаце» і г.д.

Але я хачу больш падрабязна расказаць пра тых, хто працаваў і працуе ва ўсёй «вертыкалі» БРСМ (БПСМ). Іх можна падзяліць на некалькі катэгорый.

Кідалася ў вочы вялікая колькасць так званых «мажораў» — сынкоў або дачок якіх-небудзь кіраўнікоў, альбо іншых сумніўных асоб, якіх трэба было «прыстроіць».

Другая катэгорыя — гэта «памяшаныя» на самім Лукашэнку. На шчасце, такіх адзінкі.

Вядома, былі і такія, якія сапраўды верылі, што сваёй актыўнай працай сапраўды дапамогуць вырашыць праблемы і справы моладзі. Усе больш-менш карысныя справы рабіліся менавіта такімі актывістамі.

Але асаблівай увагі патрабуе тая катэгорыя маладых функцыянераў, якую з усёй адказнасцю можна лічыць сапраўдным кадравым рэзервам лукашэнкаўскай улады. Яны спяць і бачаць сябе кіраўнікамі рэгіёнаў, дэпутатамі ўсіх узроўняў, міністрамі і нават прэзідэнтамі.

Патрыятызм імі ўспрымаецца толькі з нейкай мілітарысцкай афарбоўкай, усё сапраўднае нацыянальнае — мова, культура, сапраўдная гісторыя ўспрымаецца з відавочным раздражненнем.

Лезуць ва ўладу яны як дзеля асабістых амбіцый, так і дзеля карысці.

Я яшчэ добра памятаю незразумелае становішча на радыёстанцыі «Стыль», фінансавыя таямніцы, звязаныя з будаўніцтвам дамоў для маладых сем’яў, непразрыстыя тэндары, таксама сваімі вачыма бачыў што рабілася ў кемпінгу на Нарачы…

Чытачы могуць спытаць: «Навошта ты нам, Цыбульскі, цяпер пра гэта кажаш?

Палічыце самі, 118 райкамаў, 6 абласных камітэтаў і Цэнтральны камітэт, і ўсюды сядзяць маладыя чыноўнікі, і ўсім патрэбна зарплата, я ўжо не кажу пра гаспадарчыя выдаткі і фінансаванне мерапрыемстваў.

Дзе-нідзе нейкія карысныя справы БРСМ ўсё-такі робіць. Але гэта ўсё бессістэмна, кропкава, і пры такім фінансаванні выглядае хутчэй як лыжка мёду на бочку дзёгцю.

Што рабіць? Па-першае, не жыць у хлусні. Самім не ісці ў гэтую арганізацыю, і абгрунтоўваць сваю пазіцыю пры спробах прымусовага прыняцця. Калі вы ўжо член БРСМ і ў ім расчараваліся і больш не верыце, то адразу пішыце заяву аб выхадзе. Бацькам варта таксама актыўна ўдзельнічаць у тым, каб іх дзіця не павялося на ілжывыя лозунгі БРСМ. І наогул, калі Вы лічыце сябе моцным і таленавітым чалавекам, то павінны раз і назаўсёды зразумець, што пры сённяшняй уладзе ніякай падтрымкі не атрымаеце. А калі Вы лічыце сябе сапраўднымі патрыётамі і гатовыя за кімсьці ісці, то вельмі добра ўсё ўзважце. Патрыёты ў Беларусі ёсць, шчырыя лідары таксама. Яскравы прыклад — Зміцер Дашкевіч.

І апошняе. Я дакладна ведаю, што ў кабінетах, як улады, так і БРСМ, незалежныя СМІ чытаюць, прычым вельмі ўважліва і ў першую чаргу, а потым афіцыйную прэсу. Хачу звярнуцца да вас, так званая лукашэнкаўская змена. Я добра ведаю, што пераважная большасць з вас не верыць сённяшняй уладзе і ведае якімі сродкамі яна ўтрымліваецца. Я

ўжо 13 гадоў як не працую ў БРСМ (тады гэта БПСМ быў), але і па сённяшні дзень адчуваю нейкую асабістую адказнасць і віну.

Калі ў Вас ёсць хоць кропля сумлення і шчырасці, памятайце: доўга пражыць у хлусні самому сабе немагчыма. Падумайце добра! Жыццё не стаіць на месцы, усё рана ці позна зьменіцца. А Вы яшчэ маладыя і Вы вымушаны глядзець людзям у вочы. Так, што не ашуквайце ні сябе і не людзей!

* * *

Алесь Цыбульскі: былы функцыянер БПСМ, цяпер працуе прадпрымальнікам.

• 0
• 0
• 0
• 0
• 0
• 0
• 0
• 0