Як на АНТ музыку выбіралі
У панядзелак 28 ліпеня па АНТ паказалі чарговае ток-шоў «Выбар». Як і любыя выбары ў нас, гэты быў несур’ёзны і ні ад чога не застрахаваны. Вядучы і той быў зьдзіўлены: 9822 галасы ў канцы перадачы. Я прагаласаваў тры разы. Калі галасаваньню аддацца ўсёй душой, дык цалкам рэальна за жывы этэр аддаць сотню сваіх галасоў і столькі ж разоў пачуць падзяку на чыстай ці не зусім чыстай расейскай мове.
А галасавалі на гэты раз на тэму «Ці заўважылі Вы, што на радыё стала болей беларускай музыкі?». Маўляў, добрай беларускай музыкі шмат, і яна на радыё з ранку да ночы, але на расейскую надта падобная (нешта такое сказаў вядучы на разьвітаньне). Можа, такой музыкі і стала болей, але я яе беларускай не лічу. Колькі спадзяванак на шанец пачуць родную музыку маю, у розны час пераключаючы прыймач на ўсе беларускія FM-хвалі, але «не плачь, Алиса…»
Падчас перадачы нехта справядліва зазначыў: «У нас усе станцыі на адзін капыл». Хочацца спадзявацца, што сапраўды на радыё «Мір», як сказалі супрацоўнікі гэтае станцыі, ужо гучыць 50% родных ці амаль родных твораў. Але нешта падазронае: у заяўках на гэтай станцыі пасьля адпаведнага загаду кожны другі выбірае беларускае.
Выснова простая для ўсіх: стварайма якаснае! Праблем ня будзе. А як жа ўлады? — спытаюцца некаторыя. Стварайма якаснае!
Выпадковы глядач АНТ
Каментары