Liški braniatankavaj pradukcyi

U turmu trapiŭ dyrektar Barysaŭskaha tankaramontnaha zavodu, jaki vinavacili ŭ kantaktach z režymam Chusejna.

Vajennaja kalehija Viarchoŭnaha sudu 30 vieraśnia pakinuła biaź źmienaŭ prysud, vyniesieny načalniku Barysaŭskaha tankaramontnaha zavodu Ŭładzimieru Sakaču i namieśniku dyrektara pa markietynhu Ŭładzimieru Dziemiaškieviču. Na kasacyjnaje pasiadžeńnie pryjšli tolki svajaki i siabry padsudnych. Sakača i Dziemiaškieviča na pasiadžeńni nie było — ź lipienia jany znachodziacca ŭ śledčym izalatary.

Biełaruski vajenny sud 14 lipienia pryznaŭ Sakača i Dziemiaškieviča vinavatymi pa č.4 art.210 (kradziež u asabliva bujnych pamierach sa złoŭžyvańniem słužbovym stanoviščam, učynieny hrupaj asob pa papiaredniaj zmovie), asudziŭšy na šeść hadoŭ kalonii ŭzmocnienaha režymu z kanfiskacyjaj majomaści i zabaronaj zajmać kiraŭničyja pasady ciaham piaci hadoŭ. Z kožnaha taksama budzie spahnana pa 529 młn rubloŭ na karyść 140-ha ramontnaha zavodu za naniesienuju materyjalnuju škodu.

U.Sakač kiravaŭ respublikanskim unitarnym pradpryjemstvam «140-vy ramontny zavod» z 1991 h. Maje vialikuju kolkaść uznaharod, siarod jakich — orden «Za słužbu Radzimie», uručany asabista Łukašenkam, i dziaržpremiju Rasiejskaj Federacyi. Maje ŭznaharody i Ŭładzimier Dziemiaškievič, što pryjšoŭ na zavod 22 hady tamu.

Śledztva, jakoje ciahnułasia dva z pałovaj hady, ustanaviła, što na 151-m schoviščy tankaramontaha zavodu čatyry hady zachoŭvalisia nie pastaŭlenyja na ŭlik 29 patrymanych tankavych ruchavikoŭ. Pavodle pakazańniaŭ śviedkaŭ, Sakač praź Dziemiaškieviča vydaŭ piśmovaje rasparadžeńnie, kab ruchaviki nie padpadali pad inventaryzacyju. Ruchaviki zakupili ŭ Rasiei za 8 młn rasiejskich rubloŭ i pryvieźli ŭ Biełaruś biez supravadžalnych dakumentaŭ, a praź niekalki hadoŭ, užo adramantavanyja, aformili pa damovie ab kupli-prodažy za miažu, u vyniku čaho byŭ atrymany prybytak 221 tys. dalaraŭ. Ekspartny kantrakt byŭ uzhodnieny ź ministerstvami zamiežnych spraŭ, abarony, ekanomiki i KDB. Častka atrymanych hrošaj była pieraličana na bankaŭski rachunak zavodu, a častka — 187 tys. dalaraŭ — u biudžet dziaržavy. Ale sud paličyŭ dziejańni pradstaŭnikoŭ zavodu niezakonnymi, zafiksavaŭ parušeńni ŭ afarmleńni damovy ab kupli-prodažy. U materyjałach śledztva nie fihurujuć inšyja asoby: «Nieŭstanoŭlenaja hrupa asob pad kiraŭnictvam Sakača stvarała liški braniatankavaj pradukcyi, pachodžańnie jakoj nieviadomaje».

Sakačaŭ advakat Leanid Minčankaŭ davodziŭ, što ruchaviki nabyvalisia, kab vykanać zamiežny kantrakt dziela prybytku zavodu, a nia dziela ŭłasnaj vyhady. Abarona zapatrabavała ekanamičnaj ekspertyzy, adznačajučy, što nielha nazyvać Sakačavy dziejańni kradziažom, bo vyručanyja srodki nie pajšli ŭ jahonuju kišeniu.

Cikava, što hramadzianski pazoŭnik, pradstaŭnik ramontnaha zavodu Vasiljeŭ, padčas vystupu staŭ na pazycyju abarony, paviedamiŭšy, što pradpryjemstva adrakajecca svajho pazovu: «Uvieś zavod zamior u čakańni. Treba nienavidzieć svaju krainu, kab pasadzić za kraty takich pavažanych ludziej», — emacyjna skončyŭ jon śpič. Pradstaŭnik prakuratury Piacko paryravaŭ: «Vy kažacie pra pazycyju kiraŭnictva, a nie rabočych zavodu».

Sakača ŭ Baysavie charaktaryzavali jak «mocnaha haspadarnika». Pry im zarobak na zavodzie try hady tamu dasiahnuŭ 200 dalaraŭ. Pry hetym žyŭ dyrektar tankaramontnaha zavodu nia biedna, niekatoryja navat kažuć: «u raskošy». Pavodle čutak, jon navat mieŭ lecišča ŭ Krymie.

Paśla paŭhadzinnaha abmierkavańnia sudździa Valery Całko pastanaviŭ nie zadavalniać skarhi, pakinuŭšy prysud Sakaču i Dziemiaškieviču biaź źmien. Adnak jany trapili pad amnistyju — termin źniavoleńnia źmienšany na hod. «My ličym rašeńnie sudu niapravilnym, vina Ŭładzimiera Sakača nie dakazana. Kali jon pažadaje, to budziem abskardžać rašeńnie ŭ Viarchoŭnym sudzie», — prakamentavaŭ rašeńnie Sakačaŭ advakat Ł.Minčankaŭ.

Sakačaŭ syn raskazvaje, što baćku nialohka na Vaładarcy: «U kamery pad 20 čałaviek, za hety čas adzin ź jaho kamery paviesiŭsia, a druhi vieny pierarezaŭ».

∎

BARYSAŬSKI TANKARAMONTNY ZAVOD (UP «140-vy ramontny zavod») — hasraźlikovaje pradpryjemstva Minabarony. Zasnavanaje ŭ 1948. Zajmajecca ramontam tankaŭ, bajavych mašyn, ciahačoŭ, bronietransparteraŭ, a taksama čyhunačnaj techniki; vytvorčaściu lesapažarnaj techniki. Fihuravaŭ u skandale, źviazanym z vajennymi kantaktami Biełarusi i Iraku. U Bahdadzie byŭ znojdzieny faks na firmiennym blanku zavodu za Sakačavym podpisam, dzie išła havorka pra pastaŭki novaj i ramont staroj techniki armii Chusejna.

∎

UŁADZIMIER SAKAČ nar. 1950 u vioscy Karalin (Zelvienščyna). Skončyŭ Biełaruski politechničny instytut, paśla čaho pajšoŭ na vajennuju słužbu. Prajšoŭ prystupki ad namieśnika kamandzira tankavaj roty pa techčastcy da načalnika140-vaha ramontnaha zavodu. Kavaler ordena «Za słužbu Ajčynie» III stupieni za raspracoŭku broniemašyn «Kobra».

• 0
• 0
• 0
• 0
• 0
• 0
• 0
• 0