Milinkievič nie demahoh. Hetym jon roźnicca ad mnohich biełaruskich palitykaŭ. I hetym padkupaje.
Adzinaccać hadoŭ kiravańnia Łukašenki pakazali, što jaho niemahčyma pierakryčać. Dva dni kanhresu daviali, što Milinkievič takoj mety nia stavić.
Milinkievič nie hrymieŭ, jak Kalakin, i nia klaŭsia na Biblii, jak Labiedźka. Jon padkupaŭ inšym: hruntoŭnaściu i ščyraściu, navat lohkim chvalavańniem.
Milinkievič robić toje, čaho Łukašenka nia ŭmieje, — viadzie hutarku. Kožnaja pramova Milinkieviča — heta pierš za ŭsio dyjaloh z słuchačami.
Milinkievič pačynaje razmovu ci pramovu nie ź siabie, a z surazmoŭnika, i najčaściej — z padziaki jamu. Tak było na Kanhresie i ŭ šmatlikich interviju padčas jaho. Jon dziakavaŭ nastaŭnikam, jakija śviatkavali svajo prafesijnaje śviata, dziakavaŭ svaim supiernikam, dziakavaŭ presie.
Za čas Kanhresu Milinkievič ni razu nie pavysiŭ hołasu. Jon razmaŭlaje z trybuny tak, niby razmaŭlaje z svaimi rodnymi. Milinkievič pramaŭlaje nie da teleabjektyva i mikrafona — jon źviartajecca da słuchača jak da siabra, jaki sustreŭsia jamu na vulicy.
Milinkievič dumaje pa-biełarusku. Bieručy pad uvahu prysutnaść zamiežnych karespandentaŭ, padčas pres-kanferencyi jon paabiacaŭ adkazvać pa-rasiejsku, ale, niezaŭvažna dla siabie samoha, źbivaŭsia na biełaruskuju.
Milinkievič nie razmachvaje rukami. Chiba što zredku ściskaje dva svaje vialikija kułaki. Kali Łukašenka — hrubaja siła, dyk Milinkievič — spakojnaja siła.
Siabry pa zmahańni kažuć, što za vonkavaj miakkaściu ŭ Milinkieviču chavajecca ćviordy lider. Ćviordy da žorstkaści, prychilnik demakratyčnaha centralizmu i žaleznaj dyscypliny.
Praz svoj niemały rost (190 sm) Milinkievič ź firmovaj uśmieškaj nachilajecca da surazmoŭnika. U im niama hanarlivaści, ale adčuvajecca vysakarodztva. Čatyry pakaleńni jahonych prodkaŭ byli nastaŭnikami.
Milinkievič nie trybunny aratar. Jon nia češa jak pa-napisanamu. Jon robić paŭzy, spačatku dumaje, a potym havoryć. Jon užyvaje minimum rytaryčnych fihur. Jaki rezki kantrast da biaskoncaha visklivaha manalohu, što ciahniecca ad 1994 hodu!
Kamientary