73-ci sezon Opery adčyniŭsia 11 kastryčnika na scenie Domu aficeraŭ. Balet vystupaje na scenie Pałacu Respubliki. Symfaničny arkiestar kursuje miž dvuma budynkami.
Pa vajnie architektar Opery Iosif Łanhbard spytaŭsia ŭ siabroŭ pra razburany Miensk: «A ci acaleŭ budynak Opery?» Pačuŭšy stanoŭčy adkaz, zasmuciŭsia: «Škada». Z tych samych pavajennych časoŭ (1947) Operu nie ramantavali. Technika, huk, śviatło, lifty, scena, cechi fizyčna j maralna sastareli.
Planujecca, što rekanstrukcyja zojmie try hady. Ale nivodzin teatar u śviecie nia byŭ adrestaŭravany za taki mały termin. Ramont Adeskaha, Ryskaha, Lvoŭskaha opernych teatraŭ doŭžyŭsia prykładna siem-vosiem hadoŭ.
Rekanstrukcyja Mienskaj opery budzie prachodzić paetapna. Spačatku budzie rekanstrujavacca pałova budynku, u druhoj pałovie buduć repetavać. Paśla zakančeńnia pieršaha etapu ŭ adramantavanuju častku piarojduć artysty, a rekanstrukcyja pačniecca ŭ druhoj častcy. Ale dahetul nia vyznačany hieneralny padradčyk. Tendernaja kamisija nie zrabiła vybaru pamiž biełaruskim i serbskim varyjantam. Ułasna, mienavita arhanizacyja-padradčyk kančatkova vyrašyć, jakim čynam ramont budzie adbyvacca. Ad samaha pačatku specyjalisty MNS zajaŭlali, što dla jakasnaha ramontu budynku treba mianiać pierakryćci, heta značyć raźbirać dach.
73-ci sezon opery adčyniŭsia 11 kastryčnika na scenie Domu aficeraŭ. Tut pa pieršym časie spektakli buduć iści siem dzion u miesiac. Opera taksama damoviłasia ź filarmonijaj, što kancertnyja pastanoŭki buduć iści na filarmaničnaj scenie, jak i kancertnyja varyjanty niekatorych oper, dekaracyi jakich nia mohuć raźmiaścicca na scenie Domu aficeraŭ, naprykład, «Barysa Hadunova». Balet miesiac tamu sezon pačaŭ praz darohu, na scenie Pałacu Respubliki.
Skład abodvuch teatraŭ pracuje ŭ zvykłym režymie. Dvuch salistaŭ Opery zvolnili i adpravili na pensiju, niekalkich pieraviali na pałovu staŭki, matyvujučy heta składanymi ŭmovami isnavańnia teatru. A voś skład arkiestru pavialičyŭsia. Heta dazvolić u vypadku supadzieńnia pa časie spektaklaŭ opernaha j baletnaha teatraŭ adnačasova ihrać u abodvuch budynkach.
Sioleta zaplanavana niekalki premjeraŭ. U śniežni — «Piracki trochkutnik» italjanskaha kampazytara Haetana Danicećci, a taksama spektakl pad rabočaj nazvaj «Zapiski», jaki budzie vyklučna mužčynski. Pry kancy sezonu čakajucca premjery «Džani Skiki» Dž.Pučyni i opera «Jahonyja žonki» lidera biełaruskaj muzyki Viktara Kapyćki.
Źmienaŭ u kiraŭnictvie teatraŭ niama. Hałoŭnym dyryžeram arkiestru zastaŭsia Viktar Hałanaŭ. Dyrektaram teatru opery pracuje Halina Vahnier — dačka klasyka biełaruskaj muzyki Hienrycha Vahniera. Mastackaja kiraŭnica — žonka «boha biełaruskaha baletu» Valancina Jelizarjeva Marharyta Izvorska. Apošniaja niadaŭna zajaviła, što biez narmalnaj arkiestravaj jamy ŭ Domie aficeraŭ opera sezon nie pačnie. Choć dla pavieličeńnia jamy byli źniatyja čatyry pieršyja rady kresłaŭ, ale ciapier nie chapaje hłybini — hałovy arkiestrantaŭ uzvyšajucca nad scenaj.
U baletu svaje prablemy. U Pałacy Respubliki vialikaja zala. U vyniku na baletnych pastanoŭkach u zali jość volnyja miescy, a praź vialikuju arkiestravuju jamu ciapier nie abyścisia bieź mikrafonaŭ, inakš arkiestru nia budzie čuvać. Pražektary ŭ Pałacy nastolki mahutnyja, što skiravanymi na scenu jany «padśviečvajuć» taksama j pieršych 20 radoŭ. Na «Žyzeli» 6 kastryčnika pry kancy pieršaha aktu, jakraz kali na scenie adnačasova znachodzilisia salisty j kardebalet, pravaja dekaracyja z hrukatam pavaliłasia, padniaŭšy kłuby pyłu. Na ščaście, abyšłosia biez achviaraŭ i traŭmaŭ.
Ale hałoŭnaja prablema dla biełaruskaha baletu — finansy. Arenda zali Pałacu Respubliki dla adnaho spektaklu abychodzicca ŭ 5 tysiač eŭra, stolki kaštuje adna repetycyja. U miesiac patrebna niedzie 20 repetycyj, 10 spektaklaŭ — 150 tysiač! Tamu balet budzie šmat hastralavać za miažoj — ad Kipru da Karei.
∎
U adpaviednaści z uradavaj prahramaj, da 2010 h. u krainie majuć rekanstrujavać bolš jak 20 teatraŭ. Ahulny prajektny košt restaŭracyi j rekanstrukcyi budynku Opery acenieny na 133 młn rubloŭ.
Kamientary