Začystka Haradzienščyny pačałasia. Aryštavany vaŭkavyski pradprymalnik- aŭhaniec Mikałaj Aŭtuchovič. Uražvaje chutkaść, ź jakoj najbujniejšy vaŭkavyski biznesoviec apynuŭsia za kratami. U adzin dzień była ŭzbudžanaja kryminalnaja sprava, Mikałaj Aŭtuchovič byŭ pryznany padazravanym, potym abvinavačanym i ŭziaty pad vartu. Taki śpiech moža śviedčyć, što jaho sprava vychodzić za miežu kanfliktu pradprymalnika i kantrolnych orhanaŭ.Aryšt vaŭkavyskaha biznesoŭca Mikałaja Aŭtuchoviča staŭsia dla jaho absalutnaj niespadziavankaj. U piatnicu 14 kastryčnika pradprymalnika zaprasili zavitać va ŭpraŭleńnie finansavych raśśledavańniaŭ u Horadni, kab aznajomicca z materyjałami ekspertyzy pa firmie «Nika-trans». Cikava, što śledčy na terminovym pryjeździe Aŭtuchoviča nie nastojvaŭ. Vidać, heta i padmanuła pilnaść Aŭtuchoviča — nie padazrajučy ničoha kiepskaha, toj vyrašyŭ usio-tki pryjechać u Horadniu. Budynak upraŭleńnia jon pakinuŭ užo ŭ kajdankach.
Śledztva ličyć, što Mikałaj Aŭtuchovič nie dapłaciŭ za dva hady i dva miesiacy 679 miljonaŭ rubloŭ padatkaŭ. Pavodle druhoj častki artykułu 243 kryminalnaha kodeksu, jamu pahražaje ad troch da siami hadoŭ turmy z kanfiskacyjaj majomaści.
Adrazu paśla aryštu Aŭtuchovič abjaviŭ haładoŭku. Andrej Kuchciuk, advakat biznesoŭca, kaža, što jaho klijent pačuvajecca nia duža dobra: «Heta ŭžo treciaja haładoŭka ŭ hetym hodzie. Sam nie charčujecca, pje tolki vadu. Na zdaroŭi heta skazvajecca».
Uražvaje chutkaść, ź jakoj Aŭtuchovič pieratvaryŭsia z volnaha čałavieka ŭ aryštanta. «U adzin dzień była i kryminalnaja sprava ŭzbudžanaja, i Aŭtuchovič pryznany padazravanym, a potym i abvinavačanym i ŭziaty pad vartu, — kaža Andrej Kuchciuk. — Z kim ja ni razmaŭlaŭ, usie kažuć, što ŭ praktycy takoha pryhadać nia mohuć».
U spravie Aŭtuchoviča čort nahu złomić. Zabłytanyja zakony sparadžajuć zabłytanyja schiemy pracy. A paśla padpisańnia Łukašenkam ukazu «Ab udaskanaleńni paradku vyzvaleńnia subjektaŭ pradprymalnickaj dziejnaści ad ekanamičnaj adkaznaści» termin «ekanamičnaje złačynstva» ŭvohule hublaje ŭsialaki sens. Ukaz pryniaty ŭ metach «pieraduchileńnia nieabhruntavanaj ekanamičnaj niepłaciežazdolnaści (bankructva) subjektaŭ pradprymalnickaj dziejnaści, zachavańnia i raźvićcia vytvorčaściaŭ, najbolš značnych dla krainy i jaje rehijonaŭ».
Atrymlivajecca, što prezydent budzie mieć prava vyzvalać ad sankcyjaŭ luboha pradprymalnika ci firmu navat tady, kali sud vyrašyć inakš. Pavodle hetaj lohiki, Aŭtuchovič, jak najbujniejšy pradprymalnik Vaŭkavysku, jaki daje pracu dziasiatkam ludziej, taksama maje prava na litaść. Voś tolki ci budzie jon prasić ab toj panskaj łascy?
«Kali kazać pra tyja elektaralnyja hrupy, na jakija my siońnia možam pakłaścisia ci bolš ciesna ź imi pracavać, heta pradprymalniki i pratestanckija hramady», — zajaviŭ Aleś Milinkievič u interviju ŭpłyvovaj ukrainskaj hazecie «Dzierkało tižnia». Miensk pamiataje zabastoŭki i mitynhi minułaj zimy. Sapraŭdy, pradprymalniki vyjavilisia adnoj z samych aktyŭnych pratestnych hrupaŭ apošniaha času. I jany znoŭ pačynajuć padymać hołaŭ. Handlary rynkaŭ u Połacku i Navapołacku pačali zbor podpisaŭ pad zvarotam da Łukašenki. Pradprymalniki patrabujuć admieny dadatkovaha buchhaltarskaha ŭliku, bo pracujuć na rynkach pa adzinym padatku, jaki spłočvajuć avansam.
Razam z tym, handlary z rynkaŭ — heta muraški, kožny ź jakich abaraniaje svoj maleńki intares. I razam jany źbirajucca tolki tady, kali murašniku pahražaje čarhovy pažar. Heta hramada, jakuju, jak heta ŭžo daviała ŭłada, lohka raźjušyć, ale lohka i ŭłahodzić. Jana maje šmatlikich lideraŭ, i tamu nia maje tvaru.
Aŭtuchovič — inšaja sprava. Čałaviek, jaki «zrabiŭ» siabie sam. Aŭhaniec. Balatavaŭsia letaś u pałatu pradstaŭnikoŭ i, pavodle dadzienych instytutu Hiełapa, musiŭ pieramahčy. Damahajecca praŭdy i dla siabie, i dla inšych. Jon haładavaŭ, i kiroŭcy dałučalisia da jaho, damahajučysia źniać aryšt z taksovak. Nichto nia čuŭ, kab Aŭtuchovič pryličaŭ siabie da vorahaŭ režymu. Razam z tym, takija ludzi —našmat bolšy razdražnialnik dla ŭłady, čym mnohija štatnyja apazycyjanery.
«Ja ščyra, usim sercam spačuvaju Aŭtuchoviču, — kaža palitolah Andrej Kusialčuk, były kiraŭnik parlamenckaj vybarčaj kampanii Alesia Milinkieviča. — Aryšt Aŭtuchoviča — pieraściaroha inšym pradprymalnikam, jak bujnym, tak i małym: «siadzicie i nie vysoŭvajciesia». Adnak Andrej Kusialčuk nia ličyć, što za hetaj spravaj staić čystaja palityka: «Jon nikoli nie zajmaŭsia adkryta palitykaj, vyklučeńniem moža źjaŭlacca tolki apošniaja jahonaja sproba balatavacca ŭ pałatu pradstaŭnikoŭ, ale ŭžo tady ŭ jaho isnavali prablemy ź miascovaj uładaj i padatkovaj inspekcyjaj. U Aŭtuchoviča, naprykład, u kabinecie zaŭsiody visieŭ hierb i partret Alaksandra Łukašenki». Pavodle mierkavańnia Kusielčuka, sprava Aŭtuchoviča — najpierš kanflikt pamiž biznesam i kantrolnymi orhanami.
Tak ci inačaj, ale sama lohika zmahańnia robić Aŭtuchoviča «niebiaśpiečnym», i palityčnyja prychilnaści biznesoŭca hrajuć druharadnuju rolu. Ci moh by Aŭtuchovič pry patrebie nakiravać kalonu taksovak z Vaŭkavysku dla pratestu ŭ stalicu? Adkrytaje pytańnie. Jak, zrešty, i pytańnie: jakija pryčyny jon maje dla taho, kab hetaha nie zrabić?
Aŭtuchovič nie amorfnaja masa, a asoba. U hetym jaho siła i jaho słabaść. Aŭtuchovič maje tvar, ale jaho nadta lohka schavać za turemnymi ścienami. Aryšt i vierahodnaja izalacyja Aŭtuchoviča, na što, pa vialikim rachunku, niama čym adkazać, akramia spačuvańnia, — trapny ŭdar pa stratehii adzinaha kandydata.
Kamientary