Ci rassyłali numar kantrolnaj dla pastupleńnia ŭ himnazii praz sms? Minadukacyi dakazvaje, što nie

5 červienia dzieci, jakija pastupajuć u 5-y kłas himnazij, zdavali druhi ekzamien — matematyku.

Ranicaju 5 červienia na sajcie haziety «Komsomolskaja pravda» źjaviłasia paviedamleńnie, što numar kantrolnaj pa matematycy staŭ viadomy zahadzia i rassyłaŭsia ŭ vyhladzie SMS.

Sprava ŭ tym, što pytańni dla ekzamienaŭ biarucca sa zbornikaŭ zadač, jakija jość u ahulnym dostupie. Adnak z sotniaŭ kantrolnych vybirajecca adna, numar jakoj nieviadomy da dnia ispytaŭ. Siońnia dzieci sapraŭdy rašali kantrolnuju numar 154, jaki nibyta i byŭ ukazany ŭ sms.

Pres-sakratarka Minadukacyi Julija Vanina skieptyčna stavicca da paviedamleńnia ab vycieku infarmacyi.

«Kanvierty z zadańniami vydajucca adkaznym asobam zahadzia. Pryčym na kožnuju vobłaść idzie vialiki kanviert, u jakim lažać kanvierty z zadańniami dla kožnaj asobnaj himnazii. Siońnia ranicaju ich musili raśpiačatać pradstaŭniki ekzamienacyjnaj kamisii, kab spačatku pierarašać samim, a potym, a 11-j ranicy, addać ekzamienavanym.

Paviedamleńnie na sajcie kp.by źjaviłasia prykładna ŭ 9:55 — kali kanvierty ŭžo pavinny byli być raśpiačatanyja. Jość imaviernaść, što niechta daviedaŭsia pra numar kantrolnaj, ale heta adbyłosia tady, kali padobnaja infarmacyja naŭrad ci dapamoža ekzamienavanamu. Što tyčycca sms-rassyłki, pakul niama ni paćvierdžańnia, ni abviaržeńnia dadzienaj infarmacyi. My praviadziom pravierku. Adnak mahu skazać, što ni ŭčora, ni siońnia nichto nie źviartaŭsia ŭ Ministerstva adukacyi z paviedamleńniem pra toje, što jany daviedalisia numar kantrolnaj zahadzia», — paviedamiła Vanina.

Ale žurnalistka Nadzieja Biełachvościk śćviardžaje, što fakt rassyłki paviedamleńniaŭ z numaram kantrolnaj mieŭ miesca.

«Sama ja daviedałasia pra budučy numar kantrolnaj siońnia, a 9-j ranicy. Adnak ludzi, jakija paviedamili pra sms, atrymali paviedamleńnie jašče napiaredadni ŭviečary. Jany śćviardžajuć, što atrymali hetaje paviedamleńnie absalutna bieź nijakaj pryčyny.

A 11-j, kali niepasredna pačaŭsia ekzamien, paćvierdziłasia, što dzieci sapraŭdy pišuć kantrolnuju № 154. Da taho ž, mnie raskazali, što la adnoj ź minskich himnazij baćki stajali sa zbornikami kantrolnych pa matematycy, adkrytymi na 154-j kantrolnaj. Ja dumaju, što vyciea infarmacyi byŭ, i byŭ dastatkova maštabnym. Adnak navat kali adzin čałaviek daviedaŭsia pra numar kantrolnaj zahadździa — heta ŭžo precedent. Pryčym havarka idzie pra maleńkich dziaciej. Navošta takoje rabić?» — pytajecca jana.

Ad Redakcyi: Prosim adhuknucca tych, kamu pryjšło sms-paviedamleńnie z numaram kantrolnaj pa matematycy dla pastupleńnia ŭ 5 kłas himnazii. Kali łaska, pišycie ŭ kamienty ci na [email protected]!

P. S. Ad Redaktara. Darečy, maja dačka napisała ekzamienacyjnuju kantrolnuju na 10, choć nijakaj esemeski nie atrymlivała. Kaža: «Lehkatnia była!»

• 0
• 0
• 0
• 0
• 0
• 0
• 0
• 0