Aeraport Minsk-1 zakryli dla kamiercyjnych palotaŭ, budynak pieradali inviestaru
Epocha samaha pieršaha staličnaha aeraporta skončyłasia. Aeraport Minsk-1 zakryty dla kamiercyjnych palotaŭ, a budynak aeravakzała pieradadzieny inviestaru budučaj zabudovy.
Infarmacyju pra toje, što aeraport Minsk-1 zakryty dla kamiercyjnych palotaŭ, paćvierdzili ŭ Nacyjanalnym aeraporcie Minsk.
Były kiraŭnik pieršaha aeraporta, a ciapier načalnik aeradromnaha kompleksu Minsk-1 Viačasłaŭ Charanieka dadaŭ, što filijał Minsk-1 aficyjna spyniŭ svaju dziejnaść z 23 śniežnia 2015 hoda.
«Dla kamiercyjnych palotaŭ aeraport zakryty, my vykonvajem paloty tolki dla absłuhoŭvańnia avijaramontnaha zavoda… Sudny małoj avijacyi, jakija tut bazavalisia, raźlacielisia. Zastałosia tolki toje, što nie moža ŭźlacieć — užo sami ŭładalniki pavietranych sudnaŭ buduć hetymi pytańniami zajmacca».
Rabotniki filijała Minsk-1 pieraviedzienyja ŭ Nacyjanalny aeraport.
«Zastałasia tolki nieabchodnaja kolkaść ludziej dla padtrymańnia patrabavanych uzroŭniaŭ avijacyjnaj biaśpieki i absłuhoŭvańnia uźlotna-pasadačnaj pałasy dla avijaramontnaha zavoda — pa papiaredniaj zajaŭcy».
Raniej kiraŭnik departamienta pa avijacyi Minsktransu Uładzimir Kościn paviedamlaŭ, što aeradrom na terytoryi Minsk-1 budzie pracavać na praciahu ŭsiaho 2016 hoda, da studzienia 2017-ha. Potym i jaho zakryjuć. Da taho času płanujuć pabudavać cechi novaha avijaramontnaha zavoda na terytoryi Nacyjanalnaha aeraporta Minsk, i absłuhoŭvańnie samalotaŭ budzie pravodzicca ŭžo tam.
Viačasłaŭ Charanieka dadaje: u aeravakzale supracoŭnikaŭ filijała Minsk-1 užo niama. Budynak 28 śniežnia aficyjna pieradali inviestaru. Meblu z budynka aeravakzała pieravieźli ŭ Nacyjanalny aeraport Minsk.
Pačatak historyi pieršaha minskaha aeraporta datujecca 1933 hodam. U 1958 adkryli budynak aeravakzała (architektary Voinaŭ i Zaborski). Jon źjaŭlajecca historyka-architekturnaj kaštoŭnaściu, tamu jaho abiacali nie znosić. Vieterany avijacyi vystupali z prośbaj arhanizavać u histaryčnym budynku muziej hramadzianskaj avijacyi, adnak u adkaz im abiacali raźmiaścić muziej «u adnoj z navučalnych ustanoŭ Kastryčnickaha rajona».
Na terytoryjach aeraporta Minsk-1 i avijaramontnaha zavoda sierbskija «Braty Karyčy» płanujuć uźvieści šmatfunkcyjanalny kompleks «Minsk-Mir».
Kamientary