Niamieččyna moža źmianić staŭleńnie da mihrantaŭ u vyniku dzikich padziej u Kiolnie

«Niama ukazańniaŭ na toje, što havorka idzie pra asob, jakija raźmieščany ŭ Kiolnie ŭ jakaści biežancaŭ», — zapeŭnivała na pres-kanfierencyi 5 studzienia obier-burhamistr Kiolna Hienryjeta Rekier.

«U nas pakul niama źviestak pra złačyncaŭ», — paŭtaraŭ kiraŭnik Kiolnskaj palicyi Volfhanh Albiers. Tym nie mienš pratakoły palicyi i pakazańni śviedak dakazvajuć advarotnaje: ułady adpačatku viedali, što bolšaść z tych, chto ŭdzielničaŭ u biasčynstvach ŭ navahodniuju noč u Kiolnie — mužčyny-mihranty, piša «Niamieckaja chvala».

Vyhladaje, što ŭłady prosta zamoŭčvali hety fakt, kab nie abvastrać mižetničnych adnosin. Hiermanskaja ekanomika patrabuje pracoŭnych ruk, tamu ŭłady Niamieččyny byli hatovyja prymać novych uciekačoŭ ź Blizkaha Uschodu. Jany spadziavalisia, što bolšaść ich udasca intehravać u niamieckaje hramadstva, jak adbyvałasia z raniejšymi chvalami mihrantaŭ z byłoha SSSR, Juhasłavii i Turcyi.

Raniejšy padychod uładaŭ padtrymlivała bolšaść niemcaŭ.

Adnak nachabnyja pavodziny mihrantaŭ u Kiolnie mohuć źmianić niamieckuju hramadskuju dumku.

U pres-relizie, apublikavanym u pieršy dzień novaha hoda, Kiolnskaja palicyja paviedamiła: «Niahledziačy na niezapłanavany pierapynak u śviatkavańni, atrymałasia paźbiehnuć napružanaj situacyi — užo i tamu, što patruli demanstratyŭna raźmiaščalisia ŭ klučavych miescach».

U čaćvier zdabytkam hramadskaści stali realnyja palicejskija pratakoły padziej na pryvakzalnaj płoščy ŭ Kiolnie. Jany malujuć zusim inšuju karcinu. U 23.30 palicyja pryniała rašeńnie ačyścić płošču. Voś vytrymki z pratakołu: «U chodzie apieracyi fiederalnych i ziamielnych palicejskich abstrelvali rakietami i zakidvali butelkami. Palicejskim akazvali fizičny supraciŭ, adnačasova ich klikali na dapamohu achviary kradziažu i seksualnych damahańniaŭ ŭ roznych miescach płoščy. <…> Adnak prabicca da achviar było ciažka, tamu što vakoł ich stvarali ciesnaje koła. Palicyjanty nie mahli ŭziać pad kantrol usie złačynstvy i damahańni z-za vielmi vialikaj ich kolkaści adnačasova».

Sproby vyznačyć asoby padazravanych čaściakom nie davali vyniku. U bolšaści nie było dakumientaŭ. Inšyja padavali zamiest pašparta daviedki ab rehistracyi ŭ jakaści biežancaŭ. Palicyjantam daviałosia pačuć i takuju zajavu: «Ja siryjec, vy pavinny sa mnoj vietliva abychodzicca. Mianie zaprasiła spadarynia Mierkiel!»

U ŚMI źjaŭlajecca ŭsio bolš pakazańniaŭ achviar i vidavočcaŭ. Hazieta Express apublikavała apoviad adnoj z achviar. Mišel 18 hadoŭ. Joj pašancavała — jana adpraviłasia śviatkavać Novy hod ź vialikaj hrupaj siabroŭ. Voś, što adbyłosia: «Nas było 11 čałaviek. Niezadoŭha da paŭnočy my ad vakzała vyrašyli spuścicca da Rejna, kab pahladzieć fiejervierk. Raptam nas atačyli 20 ci 30 maładych mužčyn. My schapilisia za ruki — chłopcy napieradzie, dziaŭčynki ŭnutry. My trymalisia razam, kab nikoha nie vyrvali. Hetyja mužčyny stali da nas hruba prystavać. Ale my zdoleli prarvacca skroź natoŭp». I tolki potym spachapilisia — u niekalkich paśpieli skraści smartfony. U tym liku i ŭ Mišel. Pa-niamiecku maładyja ludzi nie razumieli.

• 0
• 0
• 0
• 0
• 0
• 0
• 0
• 0