Adam Maldzis: «Ja admoŭlusia ad zvańnia hanarovaha hramadzianina Astraŭca, kali duby zrežuć!»
Duby majuć asablivaje značeńnie ŭ historyi Astraŭca, kaža historyk.
Choć 84-hadovamu Adamu Maldzisu ŭžo nialohka chadzić, uradženiec Astravieččyny pryjšoŭ u Redakcyju «Našaj Nivy», kab pieradać svajo mierkavańnie ziemlakam. Prafiesara tak začapiła śpiłoŭvańnie duboŭ u Astraŭcy dziela budaŭnictva novaha kvartała.
«Jak astraŭčanie mohuć pasiahać na toje, što ŭ ich hierbie!? — aburyŭsia Adam Iosifavič. — Dub — heta ž spradviečny simvał Astraŭca!».
Jon navat admysłova prynios mahnicik z ułasnaha chaładzilnika z astravieckim hierbam.
«Tam ža, u Astraŭcy, byŭ majontak vilenskaha vajavody Albrechta Haštaŭta — adnaho z arhanizataraŭ i «raspracoŭščykaŭ» vydańnia Statutu VKŁ. Nieadnarazova tudy jeździli vilenskija arystakraty, i navat karol, i — ja ŭpeŭnieny — i naš pieršadrukar Skaryna, bo Z 1526 hoda pa 1530 jon słužyŭ u vilenskaha biskupa Jana. A biskup byŭ syn polskaha karala, — raspavioŭ Maldzis. - I daroha ad Vilni da Astraŭca mieła nazvu «karaleŭskaj», a ŭ histaryčnych dakumientach jaje nazyvajuć «vialikaj» — bo na joj byŭ vialiki ruch. Jana była absadžanaja mienavita dubami — dub byŭ simvałam karaleŭskaj ułady. Duby byli i la majontka, i la kaścioła. U astatnich miastečkach, la inšych majontkaŭ duboŭ niama. I navat kali siońniašnija tyja drevy ŭžo vysadžvalisia paźniej, to ŭsio roŭna — heta častka našaj historyi, jakuju nielha źniščać».
Maldzis paviedamiŭ, što jon hatovy pratestavać suprać vysiakańnia duboŭ. Pryčym, davoli niečakanym čynam.
«Mnie prysvoili zvańnie hanarovaha hramadzianina Astraŭca — tady jašče nie horada, a haradskoha pasiołka. Kali hetuju vyrubku nie admieniać, to ja admoŭlusia ad zvańnia», — z horyčču skazaŭ Adam Iosifavič.
Čytajcie taksama: SOS! U Astraŭcy vysiakajuć viekavyja duby
«Miesca im mała! Vysiakajuć takija drevy, jakija byli b azdobaj luboha horada, luboha kvartała! Dy ŭ luboj krainie ludzi hatovyja doraha zapłacić, kab mieć taki pryhožy dub na svajoj vulicy, a ŭ nas traciać bienzin i psujuć piły na zrazańnie», — emacyjna napisaŭ nam čytač z Astraŭca, jaki paprasiŭ padpisać jaho Marjanam (adras u Redakcyi jość).
Vyśvietliłasia, što zajmajecca rabotami daččynaje pradpryjemstva miascovaha ŽKH pad nazvaj «Vytvorča-ramontny ŭčastak».
Heta abumoŭlena płanam zabudovy, jaki ŭžo prajšoŭ usie ekśpiertyzy i zaćvierdžany. Na hetym miescy buduć prakładać hazapravod, kaža dyrektar pradpryjemstva Kazimir Bahdanovič.
Tym časam «Naša Niva» atrymała ŭžo inšy list ad čytačoŭ Viačasłava P. i Dzijany D., jakija skardziacca, što «pad nož» dziela budaŭnictva novaha mikrarajona (pamiž vioskami Kamienka, Słabodka i samim Astraŭcom) pojdzie ceły łandšaftny łuh — bolš za 40 drevaŭ. Voś hety:
«Naša Niva» budzie dalej sačyć za situacyjaj, ale zvaroty ŭ miascovyja kantralujučyja orhany pavinny pisać i sami žychary, kab źbierahčy miascovuju pryhažość.
Adras Astravieckaha rajvykankama: 231201, h. Astraviec, vuł. K.Marksa, 2. Telefon: (01591) 2-12-24. Zajmajecca takimi pytańniami adździeł ŽKH i hałoŭny architektar rajona.
Ciapier čytajuć
«Byŭ upeŭnieny, što ja niedatykalnaja asoba dla rasijan». Pieršaje intervju Jurasia Ziankoviča na svabodzie14
Kamientary