Biełstat: Upieršyniu bolš čym za 20 hadoŭ u Biełarusi adznačany naturalny pryrost nasielnictva
Upieršyniu bolš čym za 20 hadoŭ u Biełarusi adznačany naturalny pryrost nasielnictva, jaki razam ź mihracyjnym pryrostam zabiaśpiečyŭ pavieličeńnie kolkaści nasielnictva krainy, paviedamiŭ Nacyjanalny statystyčny kamitet.
Pavodle źviestak Biełstata, kolkaść nasielnictva na 1 kastryčnika 2016 hoda skłała 9 młn 505,2 tys. čałaviek i ŭ paraŭnańni z pačatkam hoda vyrasła na 6.799 čałaviek.
Za studzień—vierasień hetaha hoda naturalny pryrost skłaŭ 518 čałaviek. U adpaviednym pieryjadzie minułaha hoda naziralisia naturalnyja straty — 1.762 čałavieki.
U studzieni—vieraśni 2016 hoda ŭ respublicy naradziłasia 89.434 dzicia, što na 455 dziaciej (na 0,5%) bolš, čym u studzieni—vieraśni 2015 hoda. Lidary pa kolkaści novanarodžanych Minsk (16.844 dzicia) i Bresckaja vobłaść (14.162 dzicia).
Uzrovień naradžalnaści pavialičyŭsia z 12,5 na 1.000 čałaviek nasielnictva ŭ studzieni—vieraśni 2015 hoda da 12,6 u studzieni—vieraśni 2016 hoda.
Kolkaść pamierłych skłała 88.916 čałaviek i ŭ paraŭnańni sa studzieniem—vieraśniem 2015 hoda źmienšyłasia na 1.825 čałaviek (na 2%). Źnižeńnie kolkaści pamierłych nazirałasia va ŭsich abłaściach respubliki i stalicy. Uzrovień śmiarotnaści źniziŭsia z 12,8 na 1.000 čałaviek nasielnictva ŭ studzieni—vieraśni 2015 hoda da 12,5 u anałahičnym pieryjadzie 2016 hoda.
Mihracyjny pryrost nasielnictva za dzieviać miesiacaŭ biahučaha hoda skłaŭ 6.281 čałaviek. Asnoŭny mihracyjny abmien Biełarusi adbyvaŭsia z krainami SND. U studzieni—vieraśni z hetych krain u respubliku prybyŭ 11.381 čałaviek. Dola tych, chto prybyŭ z Rasijskaj Fiederacyi, Ukrainy, Turkmienistana i Kazachstana, skłała 93%. U liku vybyŭšych pieravažali asoby, jakija vyjechali ŭ krainy SND. Ich dola ŭ ahulnym liku tych, chto vyjechaŭ z respubliki, skłała 69,9%, ź ich u Rasijskuju Fiederacyju — 67,8%.
Pavodle danych aficyjnaj statystyki, u studzieni—vieraśni 2016 hoda zarehistravana 51.963 šluby. Aficyjna skasavali šlub 24.076 siemjaŭ.
Kamientary