TBM prapanuje ŭviekaviečyć u Škłovie pamiać represavanaha piśmieńnika Michasia Zareckaha
Tavarystva biełaruskaj movy prosić Škłoŭski rajvykankam paspryjać ŭviekaviečańniu pamiaci piśmieńnika Michasia Zareckaha. Da staršyni rajonnaj ułady Alaksandra Bojki źviarnuŭsia kiraŭnik Tavarystva Aleh Trusaŭ.
20 listapada — 115 hadoŭ z dnia naradžeńnia Michaiła Kasiankova, bolš viadomaha pad psieŭdanimam Zarecki. Na dumku aktyvistaŭ TBM, hetaja data pavinna stać padstavaj, kab u tapanimicy Škłova źjaviłasia imia piśmieńnika.
«Mienavita ŭ Škłoŭskim Zarečča prajšło dziacinstva budučaha piśmieńnika i niepasredna tut naradziŭsia piśmieńnikaŭ psieŭdanim. Na hałoŭnaj vulicy vioski niekali znachodziłasia carkva Śviatoj Trojcy, dzie psałomščykam byŭ jaho baćka Jaŭchim Anufryjevič, jaki adyhraŭ vialikuju rolu ŭ farmiravańni estetyčnych hustaŭ piśmieńnika», — cytuje «Svaboda» list Aleha Trusava.
Prapanujecca taksama imia piśmieńnika nadać adnoj ź biblijatek, jakaja raźmiaščajecca na vulicy Małaja Zarečnaja.
U 2013 hodzie, kali da rajcentra dałučyli viosku Zarečča, miascovyja TBMaŭcy ŭžo prapanoŭvali čynoŭnikam nazvać adnu z vulic u pasieliščy imiem Zareckaha. Hetaja inicyjatyva nie znajšła padtrymki.
«Vielmi chočacca spadziavacca, što Škłoŭski rajvykankam u «Hod kultury» ŭsio ž taki niejak adhukniecca na prapanovy» Tavarystva biełaruskaj movy imia Francyska Skaryny «i imia słavutaha biełaruskaha piśmieńnika źjavicca ŭ tapanimicy Škłova», — adznačajuć u liście.
Los aŭtara ramanaŭ «Ściežki-darožki» (1928) i «Viaźmo» (1932) skłaŭsia trahična. U 1936 hodzie jaho aryštavali. Abvinavacili va ŭdziele ŭ «nacyjanał-fašysckaj terarystyčnaj arhanizacyi». U 1937-m asudzili da rasstrełu. U HUŁAH była sasłanaja i žonka piśmieńnika.
Kamientary