«Šanoŭnyja siabry! Na pačatku hrypoznaha siezona paprašu vas nie lačyć reśpiratornyja infiekcyi (hryp i inš. VRVI) supraćvirusnymi preparatami. Asabliva ŭ dziaciej», — piša ŭ svaim fejsbuku doktar Andrej Vituška.
«Viadziecca pra lubyja supraćvirusnyja preparaty — ad remantadzina z hroprynasinam da anafierona i interfieronavych śviečak. Tamu što heta:
1. niepatrebna;
2. biessensoŭna;
3. niebiaśpiečna,
albo ŭsio razam.
Niepatrebna, bo ŭ bolšaści vypadkaŭ arhanizm sam daść rady virusu, jamu tolki treba dapamahčy (bolej vadkaści, źnizić zanadta vysokuju tempieraturu (38-38,5) i h.d).
Biessensoŭna, bo reśpiratornych virusaŭ vialikaje mnostva, i nie fakt, što mienavita vaš budzie adčuvalny da preparata, jaki vy prymajecie. U dadatak virusy pastajanna mianiajucca. Jak paviedamlajuć amierykanskija kalehi, bolšaść varyjantaŭ sioletniaha virusa hrypu vypracavała ŭstojlivaść da viadomaha supraćvirusnaha «Remantadzina».
Efiektyŭnaść raznastajnych interfieronavych preparataŭ, a taksama tych, što ŭpłyvajuć na sintez interfierona, pierakanaŭča nie dakazana. Tłumačeńnie efiektu hamieapatyčnaha «Anafierona» znachodzicca ŭ śfiery psichałohii, a nie virusałohii. Tamu vysnova prostaja — bieražycie piečań (vašu i vašych dziaciej) — nie napružvajcie jaje biestałkovym pryjomam nieefiektyŭnych substancyj.
Biezumoŭna, jość supraćvirusnyja leki, jakija mohuć efiektyŭna prymianiacca pry hrypie, jaki ciažka praciakaje i časam daje niepryjemnyja ŭskładnieńni. Ale heta surjoznyja preparaty z mahčymymi pabočnymi efiektami. Samastojna prymać ich niebiaśpiečna — tamu metazhodnaść hetaha varta abmierkavać z doktaram, jaki nie tolki trymajecca tradycyj, ale i sočyć za sučasnymi navukovymi publikacyjami i dasiahnieńniami».
Kamientary