Biełaruskija słužbovyja asoby vyrašyli nie ŭpuskać u krainu členaŭ Jeŭraparłamienta, jakija cikaviacca budaŭnictvam na BiełAES u Astraŭcy, paviedamiŭ jeŭraparłamientaryj Piatras Aŭštravičus.
Palityk adznačyŭ, što akramia jaho chacieli naviedać Biełaruś Alhirdas Saŭdarhas, Bronis Ropie i niamiecki jeŭraparłamientaryj Rebieka Charmi.
«My chacieli pabyvać u Minsku, sustrecca z pradstaŭnikami vykanaŭčych uładaŭ, zadać im pytańni ab budaŭnictvie Biełaruskaj AES, a paźniej, paśla sustrečy z pradstaŭnikami niekalkich niaŭradavych arhanizacyj, pabyvać na placoŭcy budaŭnictva AES u Astraŭcy», — skazaŭ u aŭtorak ahienctvu BNS Aŭštravičus.
«Adkaz z ambasady Respubliki Biełaruś u Bielhii kazaŭ ab tym, što jany nie bačać mahčymaści z-za niedachopu času arhanizavać padobnyja sustrečy», — dadaŭ jon.
Aŭštravičus adznačyŭ, što jeŭraparłamientaryi płanavali pabyvać u Biełarusi 20 krasavika, a da dypłamataŭ hetaj krainy pa pytańni vizitu źviarnulisia jašče na minułym tydni. Admoŭny adkaz biełarusaŭ členy JEP atrymali ŭ paniadziełak. Pavodle jaho słoŭ, rašeńnie biełarusaŭ nie ŭpuskać palitykaŭ — palityzavanaje.
«Ja liču, što heta reakcyja biełaruskich uładaŭ na pryniatuju na minułym tydni ŭ Jeŭraparłamiencie rezalucyju, jakaja asudžaje dziejańni biełaruskich słužbovych asob suprać aktyvistaŭ apazicyi padčas pratestaŭ. Inšaja sprava, što biełaruskaja ŭłada nie asabliva imkniecca adkazvać na pytańni, jakija b my nie zadavali», — skazaŭ Aŭštravičus.
Litoŭski ŭrad śćviardžaje, što BiełAES budujecca biez vykanańnia patrabavańniaŭ biaśpieki. Minsk takija abvinavačvańni adprečvaje.
Kamientary