Śpiecyjalisty Fiederalnaha miedyka-bijałahičnaha ahienctva (FMBA) raspracavali preparaty, zdolnyja zamianić zabaronieny Suśvietnym antydopinhavym ahienctvam (WADA) mieldonij.
«My znajšli zamienu mieldoniju, pryčym niekalki preparataŭ, jakija nie adniesieny da zabaronienaha śpisu, jany pracujuć kudy lepš, čym mieldonij», — zajaviŭ kiraŭnik FMBA Uładzimir Ujba (cytata pa «RIA Novosti»).
Jon asabliva adznačyŭ, što pakolki novyja preparaty bolš efiektyŭnyja i nie ŭvachodziać u čorny śpis WADA, to pra mieldonij zaraz možna zabycca.
Ujba paviedamiŭ taksama, što WADA pryznała vyjaŭleny FMBA indyvidualny charaktar vyvodzin z arhanizma mieldoniju.
«Što my vyjavili i što pryznała WADA: paśla zakančeńnia dzieviaci miesiacaŭ u piaci z šaści padyspytnych kancentracyja ŭ mačy skłała ad 18 da 20 nanahramaŭ na litr, a miaža WADA ŭstalavana ŭ 100 nanahramach. Jašče ŭ adnaho padyspytnaha — 400 nanahramaŭ. Vysnova, ź jakoj pahadziłasia WADA, — što jość indyvidualnaje nazapašvańnie rečyva», — rastłumačyŭ Ujba.
Mieldonij byŭ sintezavany ŭ 1975 hodzie ŭ Łatvijskaj SSR i pradavaŭsia ŭ krainach byłoha SSSR jak rečyva pad handlovaj nazvaj «Miłdranat». Preparat vykarystoŭvaŭsia dla paskareńnia reabilitacyi paśla fizičnych nahruzak i ŭ paślaapieracyjny pieryjad, a taksama ŭ składzie kompleksnaj terapii pry zachvorvańniach serca.
U śpisie zabaronienych da ŭžyvańnia spartsmienami preparataŭ WADA mieldonij akazaŭsia z 1 studzienia 2016 hoda, paśla čaho ceły šerah spartsmienaŭ byŭ dyskvalifikavany, a rasijskija lohkaatlety, za vyklučeńniem Darji Klišynaj, naohuł nie trapili na Alimpijadu ŭ Rya-de-Žaniejra.
Kamientary