U druhim tury Nikas Anastasiadzis atrymaŭ upeŭnienuju pieramohu nad pradstaŭnikom levych siłaŭ. Jon zastaniecca va ŭładzie jašče na piać hadoŭ, paviedamlaje DW.
Pa dadzienych ministerstva ŭnutranych spraŭ, Nikas Anastasiadzis nabraŭ amal 56 pracentaŭ hałasoŭ vybarščykaŭ. Jaho supiernik, kandydat ad levych siłaŭ Staŭras Małas, jakoha padtrymlivała ŭpłyvovaja Prahresiŭnaja partyja pracoŭnaha naroda Kipra, atrymaŭ padtrymku 44 adsotkaŭ vybarščykaŭ. Jon užo pavinšavaŭ Anastasiadzisa. Pieramožca druhoha tura vyjhraŭ i pieršy tur — u im jon nabraŭ 35,5 adsotka hałasoŭ.
Prychilniki Anastasiadzisa śviatkujuć pieramohu na hałoŭnaj płoščy Nikasii, paviedamlajuć ahienctvy. Jaho histaryčnaj zadačaj budzie spryjać abjadnańniu padzielenaj na hreckuju i tureckuju častki vyspy. Čarhovy raŭnd pieramovaŭ ab abjadnańni kiprskaj dziaržavy ŭ šviejcarskim Kran-Mantana letam zaviaršyŭsia biezvynikova. Abodva supierniki ŭ druhim tury vystupali za praciah pieramovaŭ.
Hałoŭnym sprečnym pytańniem na pieramovach źjaŭlajecca sistema dziaržaŭ-harantaŭ, a taksama pytańnie vyvadu tureckich vajskoŭcaŭ z vyspy. Ankara vykazała hatoŭnaść vyvieści vialikuju častku svajho kantynhientu, jaki ciapier składaje 35 tysiač sałdat, ź niepryznanaj mižnarodnaj supolnaściu Tureckaj respubliki Paŭnočnaha Kipra. Ale pry ŭmovie, što astatniaja častka vajskovaha kantynhientu praciahnie znachodzicca na vostravie jak minimum na praciahu 15 hadoŭ, a Turcyja zachavaje status dziaržavy-haranta. Ułady Kipra i Hrecyi nastojvajuć na poŭnym vyvadzie tureckich vojskaŭ z vyspy i zajaŭlajuć, što dziaržavy ES nie majuć patreby ŭ dziaržavach-harantach.
Ciapier čytajuć
Cichanoŭskaja i Zialenski ŭpieršyniu praviali sustreču. Zialenski zaprasiŭ Śviatłanu ŭ Kijeŭ9
Kamientary