Błohiera ŭ majcy z čynoŭnikami aštrafavali na 735 rubloŭ za siužet na «Biełsacie», u jakim jon byŭ hierojem
Andrej Pavuk, viadomy jutub-kanałam «Rudabielskaja pakazucha», aštrafavany sudom Akciabrskaha rajona na 735 rubloŭ. Nahodaj dla spravy staŭ videasiužet pad nazvaj «Błohieru pahražajuć sudom za fota čynoŭnikaŭ na majcy», jaki vyjšaŭ na «Biełsacie» 8 lipienia.
Historyja z hetaj majkaj pačałasia jašče ŭ červieni: u pačatku leta Andrej Pavuk pryjšoŭ na vypuskny ŭ majcy, jakaja źmiaščała partrety čynoŭnikaŭ: staršyni Akciabrskaha rajvykankama Uładzimira Jelisiejeva i kiraŭnicy spraŭ Valanciny Šłapakovaj. Pad fotazdymkam byŭ nadpis «Jany lubiać ciabie». Čynoŭniki tady padobny kreatyŭ nie acanili i napisali na błohiera zajavu ŭ milicyju, maŭlaŭ, jon takoj majkaj ich abraziŭ. Ale pryciahnuć da adkaznaści Pavuka nie ŭdałosia.
U pačatku lipienia sam Andrej zrabiŭ na vulicy Rudabiełki apytanku na temu, ci možna ličyć abrazaj majku z fotazdymkam čynoŭnikaŭ i nadpisam «Jany lubiać ciabie». Videamateryjał jon apublikavaŭ na svaim kanale 4 lipienia, a 8 lipienia na hetuju ž temu vyjšaŭ siužet na Biełsacie. Jon u tym liku źmiaščaŭ kavałak apytanki, zroblenaj Pavukom.
U vyniku błohiera pryznali vinavatym ŭ niezakonnym raspaŭsiudzie pradukcyi ŚMI: «vykanaŭ funkcyju žurnalista zamiežnaha ŚMI». Sam Andrej siabie vinavatym nie pryznaje i zapeŭnivaje, što ź Biełsatam nie supracoŭničaje. «30 bazavych vieličyń za toje, čaho ja nie vyrablaŭ», — aburajecca jon.
Kamientary