Ab niezvyčajnym pacyjencie i niestandartnym lačeńni napisana ŭ artykule ŭ časopisie Annals of Internal Medicine.
U Hiermanii ŭ kryvi mužčyny było tak šmat tłušču, što jana stała małočnaha koleru. Mužčyna pakutavaŭ ad dyjabietu, ale nie prymaŭ nieabchodnyja preparaty. Jon moh pamierci, ale lekaram atrymałasia vyratavać jaho, užyŭšy daŭno zabyty mietad.
Daktary sutyknulisia z takim upieršyniu.
39-hadovy mužčyna trapiŭ u adździaleńnie nieadkładnaj dapamohi z młosnaściu, vanitami, hałaŭnym bolem i azmročanaj śviadomaściu. Jon pakutavaŭ na dyjabiet i pavinien byŭ rehularna prymać peŭnyja preparaty, ale nie rabiŭ hetaha. U špitali mužčyna straciŭ prytomnaść — kab jon nie zadychnuŭsia, spatrebiłasia dychalnaja trubka.
Analiz kryvi pakazaŭ nadzvyčaj vysoki ŭzrovień tryhlicarydaŭ — tłuščavaj substancyi. U normie jon składaje mienš za 150 h/dł, a ŭzrovień bolš za 500 mh/dł ŭžo ličać vielmi vysokimi. U pacyjenta ŭtrymańnie tryhlicarydaŭ ŭ kryvi było zvyš 14 tysiač mh/dł.
Takoje pavyšeńnie ŭzroŭniu tryhlicarydaŭ mahło pryvieści da pankreatytu. Analizy pakazali pavyšeńnie ŭzroŭniu fiermientaŭ padstraŭnikavaj załozy. Akramia taho, u mužčyny byŭ znojdzieny kietaacydoz — vostraje ŭskładnieńnie praz dyjabiet, kali arhanizm ź vialikaj chutkaściu rasščaplaje tłušč i ŭ kryvi nazapašvajucca kietonavyja cieły — pradukty abmienu rečyvaŭ. U peŭnych kolkaściach jany važnyja dla enierhietyčnaha bałansu arhanizma, ale ich lišak zdolny pryvieści da komy.
Dla ačystki kryvi ad tryhlicarydaŭ vykarystoŭvajecca płazmafierez — zabor kryvi, jaje ačyščeńnie i viartańnie nazad u kryvaciok.
Adnak lekaraŭ čakała niespadziavanka: aparat dla ačystki kryvi prosta zabiŭsia tłuščam i złamaŭsia. Dvojčy. Tamu im pryjšłosia rabić pacyjentu krovapuskańnie, paralelna uvodziačy donarskuju płazmu.
Heta dapamahło źnizić kancentracyju tryhlicarydaŭ. Paźniej lekary paŭtaryli praceduru. Praz dva dni ŭzrovień tryhlicarydaŭ ŭ kryvi pacyjentaŭ paniziŭsia nastolki, što lekaram, narešcie, udałosia pravieści płazmafierez. Jašče praź niekalki dzion čałaviek zmoh dychać sam i daktary vydalili trubku.
Daktary pryznajucca, što sutyknulisia z padobnym vypadkam upieršyniu. Jany adznačajuć, što ŭ vypadkach, kali płazmafierez niemahčymy, krovapuskańnie i dalejšaje vykarystańnie donarskaj kryvi moža być efiektyŭnaj alternatyvaj. «Nakolki nam viadoma, heta pieršaja spravazdača, jaki apisvaje hetuju praceduru», — havorycca ŭ artykule.
«Anlifanščyca ź Pinska» kaža, što jana nie anlifanščyca i nie ŭ rabstvie ŭ Mjanmie6
Kamientary