«Jany kruciejšyja za nas!» — navošta apteki «Adel» biaruć na pracu piensijanieraŭ
Sietka aptek «Adel» zapuściła ŭ Biełarusi prajekt «Starejšy śpiecyjalist», natchniŭšysia, z adnaho boku, paśpiachovymi kiejsami zamiežnych kampanij, a z druhoha — nazirańniem za stylem žyćcia sučasnych stałych biełarusaŭ.
Prajekt raźličany na adkryćcio novych vakansij śpiecyjalna dla ludziej starejšaha ŭzrostu i stvareńnie mahčymaściaŭ dla raźvićcia i aktyŭnaha ładu žyćcia piensijanieraŭ. Na pracu zaprašajuć farmaceŭtaŭ, pravizaraŭ, a taksama administrataraŭ-kansultantaŭ.
Darečy, dla pracy na pasadzie administratara handlovaj zały apteki nie abaviazkova mieć farmaceŭtyčnuju adukacyju. Heta značyć, što ŭ kastynhu mohuć uziać udzieł usie, kamu ŭžo jość 55 hadoŭ, nie zvažajučy na raniejšuju prafiesiju.
Piensijanieraŭ nie prosta zaprosiać na pracu ŭ najlepšyja apteki sietki, a stvorać umovy dla paśpiachovaj karjery, daduć dostup da atrymańnia novych viedaŭ.
Z udzielnikami prajekta, a taksama z supracoŭnikami sietki aptek «Adel» starejšaha ŭzrostu — farmaceŭtami, pravizarami i administratarami — buduć pracavać viadomyja stylisty, ekśpierty ŭ halinie zdarovaha ładu žyćcia, fitnesu, imidžmejkiery. Meta prajekta, jak tłumačać arhanizatary, — źmianić staŭleńnie da ŭzrostu na rynku pracy ŭ Biełarusi i złamać stereatyp, praź jaki ludzi ŭ 50+ stanoviacca niepatrebnyja pracadaŭcam.
«Pieršuju zajaŭku na ŭdzieł u prajekcie my atrymali jašče da abviaščeńnia kastynhu. Nam patelefanavaŭ mužčyna. Pračytaŭšy anons u haziecie, jon nie pavieryŭ, što takoje mahčyma. Patelefanavaŭ, kab daviedacca, ci praŭda heta. Navina pra prajekt raźlaciełasia chutka — spracavała sarafannaje radyjo, — raspaviadaje kaardynatar prajekta Julija Špak. — Vyśvietliłasia, što hetamu mužčynie 63 hady i ŭ jaho try vyšejšyja adukacyi. Raniej jon pracavaŭ vykładčykam, ale z vychadam na piensiju zastaŭsia za bortam».
Na dumku kaardynatara prajekta, tak nie pavinna być. Pavinien minuć toj čas, kali zaprašeńnie na pracu va ŭzroście 55+ vyklikaje zdziŭleńnie.
Siońnia mnohija piensijaniery — aktyŭnyja: jany padarožničajuć, karystajucca internetam, vučać zamiežnyja movy, viaduć spartyŭny ład žyćcia, atrymlivajuć novyja prafiesii, zajmajucca biznesam.
«My šmat havorym pra maładoje pakaleńnie. Ale možna skazać, što siońnia taksama čas novaha pakaleńnia darosłych ludziej. Tolki praciahvajuć stavicca da jaho, jak da papiarednich, — tłumačyć Julija. — Mienavita tamu my i vyrašyli dać šaniec sučasnym darosłym ludziam jak maha daŭžej zastavacca zapatrabavanymi ŭ hramadstvie».
Z čaho ŭsio pačałosia
Treba razumieć, što «Adel» — heta nie zusim kłasičnyja apteki.
«Siońnia heta sučasnyja minimarkiety, kudy prychodziać ludzi, jakija sočać za svaim zdaroŭjem, kab kupić nie tolki leki, ale i ŭsio toje, što dapamahaje zachoŭvać zdaroŭje, fizičnuju formu i pryhažość pry chutkim rytmie žyćcia: vitaminy, kaśmietyku, miedycynskuju techniku, pradukty charčavańnia, — raskazvaje Julija Špak. — Pakupniki — my z vami — sučasnyja, darosłyja, patrabavalnyja klijenty, jakija chočuć različvać jak na ekśpiertnuju farmaceŭtyčnuju dapamohu la pieršaha stała, dzie adpuskajuć leki, tak i na ŭvažlivuju, kampietentnyiu kansultacyju ŭ handlovaj zale apteki. I voś tut patrebnyja ludzi, jakija zmohuć natchniać svaim staŭleńniem da žyćcia, vopytam, stylem, žyćciovaj siłaj i niezaležnaściu ad stereatypaŭ — to bok darosłyja ludzi. Nie zaŭsiody ŭ maładoha kansultanta moža chapić dośviedu pačuć i adčuć, što treba spraktykavanamu, upeŭnienamu sučasnamu klijentu».
Na sustrečy z pretendentami.
Z hetaha i ŭźnikła ideja zaprasić na pracu śpiecyjalistaŭ z bahatym dośviedam, z asabistym pazityŭnym staŭleńniem da žyćcia. Stylovych, adukavanych, upeŭnienych u sabie i z žadańniem paśpiachova realizoŭvacca ŭ prafiesii.
Jak heta budzie pracavać
«My pačali supracoŭničać z «Centram aktyŭnaha daŭhalećcia», paznajomilisia ź jaho aktyŭnymi ŭdzielnikami i pierakanalisia, što dumajem pra piensijanieraŭ stereatypami. A jany, ujavicie sabie, u 1000 razoŭ kruciejšyja za nas!» — kaža Julija.
Na kastynh, jaki abviaściła «Adel», pryjšli 483 zajaŭki. Samaj starejšaj pretendentcy na vakansiju kansultanta — 81 hod. U matyvacyjnym liście jana napisała, što vučyć zamiežnyja movy i zajmajecca tryjatłonam, tamu adpracavać čatyry hadziny (pałovu źmieny) na nahach i vyvučyć bahaty asartymient dla jaje absalutna nie prablema.
«Ja jašče vašych maładych pierastaju», — kaža jana. I pierastaić ža!
15 najlepšych pretendentaŭ pa vynikach sumoŭja atrymajuć mahčymaść prajści admysłovyja navučalnyja kursy. Piaciora vypusknikoŭ, jakija najbolš paśpiachova jaho zavieršać, zmohuć pracaŭładkavacca ŭ sietku aptek «Adel».
«Chaču padkreślić, što hety prajekt nie sacyjalny. U nas niama mety škadavać hetych ludziej, iści na sastupki. Chutčej naadvarot: my chočam dać hodnuju pracu z hodnym zarobkam i mahčymaściami ŭ kampanii, jakaja ŭvachodzić u lik najlepšych pracadaŭcaŭ krainy pa vynikach prafiesinaj premii «HR Brend Biełaruś». Tamu i patrabavańni ŭ nas adpaviednyja, ale adnolkavyja da ŭsich supracoŭnikaŭ», — źviartaje ŭvahu Julija Špak.
Navučalny kurs składajecca z vaśmi dyscyplin. U pieršuju čarhu — profilnyja pradmiety. Navučency vyvučać asartymient aptek i projduć treninhi pa prodažach. Darečy, z udzielnikami buduć pracavać taksama stylisty i fitnes-treniery. Apošnija raskažuć, jak pravilna charčavacca i vieści zdarovy ład žyćcia. Budzie pracavać i psichołah, jaki daść navyk efiektyŭnaj kamunikacyi, raskaža pra asablivaści pracy ź ludźmi, a taksama dapamoža viarnuć upeŭnienaść, źmianić staŭleńnie da ŭzrostu.
Navučalny kurs budzie doŭžycca paŭtara miesiaca, pry kancy maja navučencaŭ čakajuć stažyroŭka i ekzamien.
«Prajekt pakul achoplivaje tolki Minsk. Ščyra kažučy, my nie viedajem, jakim budzie vynik. Ale abiacajem, što ŭ vierasni damo praŭdzivuju spravazdaču, ci zmahli ludzi ŭzrostu 55+ znajści siabie ŭ prafiesii kansultanta i pačać efiektyŭna pracavać. A taksama, ci zmahła kamiercyjnaja kampanija stvaryć umovy dla pracy darosłych ludziej. Kali budzie pośpiech, my zmožam razmaŭlać z najlepšymi biełaruskimi brendami i bujnymi kampanijami pra dałučeńnie da prajekta. I ŭ hetym my bačym realnuju mahčymaść źmianić daŭno sastareły stereatyp, źviazany z uzrostam», — padsumoŭvaje Julija Špak.
Ciapier čytajuć
«Chaču ŭziać intervju» — «Nie» — «Davajcie ja vas sfatahrafuju» — «Nie». Bialacki raskazaŭ pra sustreču ŭ kałonii z Pratasievičam6
Kamientary