Łukašenku rychtujuć varyjant Muhabe
Z brusielskich kułuaraŭ pratačylisia adhałoski dyskusii pra toje, ci varta zaprašać Łukašenku na ŭstanoŭčy samit «Uschodniaha partniorstva». Akazvajecca, nieprymirymyja praciŭniki «apošniaha dyktatara Jeŭropy» raspracavali vierałomny scenar. Piša Alaksandr Kłaskoŭski.
27—28 sakavika ministry zamiežnych spraŭ krain ES ładziać niefarmalnuju sustreču ŭ Čechii. Budzie fihuravać i biełaruskaje pytańnie.
Pryčym jaho stavić rubam kiraŭnik niderłandskaj dypłamatyi Maksim Fierchahien, jaki akurat i ličyć, što cackacca z režymam niama čaho. Pabačym, što atrymajecca ŭ suchoj astačy ad hetaj dyskusii (u tym liku i ŭ piersanalnym pytańni: ci zaprašać Łukašenku na ŭstanoŭčy samit novaj prahramy).
Brusielskija krynicy tym časam vydajuć kułuarnyja tajamnicy: čamu tydniem raniej Rada ES, paćvierdziŭšy ŭłučeńnie Biełarusi va «Uschodniaje partniorstva», adsunuła pytańnie pra piersanalny zaprašalnik. Akazvajecca, najbolej paščyravaŭ hałandski premjer Bałkienende.
Maŭlaŭ, kali i zaprašać Łukašenku na ŭstanoŭčy samit, to treba naładzić taki ž pryjom, jak dyktataru Muhabe pazaletaś u Partuhalii.
Sa słoŭ karespandenta «Radyjo Svaboda» ŭ Brusieli Achta Łobjakasa, Muhabe tady «paddali vielmi vostraj publičnaj krytycy, miž inšym, z boku Anhieły Mierkiel. Hetym razam heta nieabaviazkova budzie Mierkiel, ale niechta napeŭna ŭłupić jamu (u sensie — biełaruskamu kiraŭniku. — A.K.) pa poŭnaj prahramie».
Darečy, vierałomny Zachad užo zamańvaŭ Łukašenku padobnym čynam u pastku.
Vialiki skandał razhareŭsia ŭ 1998 hodzie na forumie ŭ Kran-Mantanie. I chto b moh padumać? Zaprasili pa-ludsku, kulturna (sam fundadar forumu naviedaŭ Minsk!), a potym — oba-na! — naładzili takuju abstrukcyju, što vysoki hość musić litaralna lapnuć dźviaryma.
Dadamo, što toj vizit adbyvaŭsia na fonie kanalizacyjnaha skandału z vysialeńniem zachodnich dypłamataŭ z Drazdoŭ.
Z Prahaj, miž inšym, taksama źviazany nie samyja pryjemnyja asacyjacyi. U 2002 hodzie čechi vierałomna «prakinuli» aficyjnaha kiraŭnika Biełarusi ź vizaj, kali toj zachacieŭ naviedać samit NATO. Nastupstvy skandału adčuvajucca i dasiul: dajšło da adklikańnia ambasadaraŭ, i pa siońnia abiedźvie misii — biełaruskuju ŭ Prazie i češskuju ŭ nas — uznačalvajuć časovyja pavieranyja.
Tak što Łukašenka jašče sto razoŭ uzvažyć, a ci varta ŭ traŭni lacieć u tuju Prahu.
Kaniečnie, pakutlivaja dylema moža i nie paŭstać uvohule, kali damohucca svajho jahonyja nieprymirymyja ŭnutranyja praciŭniki, što davodziać Jeŭropie: zaprašalnik u Prahu dla «apošniaha dyktatara» budzie ŭ pryncypie vialikaj pamyłkaj!
Ciapier čytajuć
Piać hadoŭ tamu «dydžei pieramien» uklučyli Coja na dziaržaŭnym mierapryjemstvie. Što ź imi ciapier?1
Piać hadoŭ tamu «dydžei pieramien» uklučyli Coja na dziaržaŭnym mierapryjemstvie. Što ź imi ciapier?
Chrysta Hrozieŭ: ad ramantyka-radyjoamatara da čałavieka, jaki vykryŭ samyja zmročnyja tajamnicy HRU i FSB. Jak jaho vierbavała śpiecsłužba Luksiemburha i jak jon vymušany chavacca ciapier
Kamientary