«Davali litr vady na sutki papić i litr zmyć «taŭčok». 22 dni ŭ karcary pratrymali Volhu Nikałajčyk

Režysiorka, hramadskaja aktyvistka Volha Nikałajčyk była zatrymanaja 7 červienia supracoŭnikami AMAP. U vyniku ŭ izalatary na Akreścina jana praviała roŭna 30 sutak. 7 lipienia paśla abiedu Nikałajčyk vyjšła na volu, svaimi ŭražańniami jana padzialiłasia z «Našaj Nivaj».

Pavialičyć

«Dvaccać dvoje sutak ja praviała ŭ ŠIZA — heta takaja bietonnaja kamiera 2 na 2. Škonku prykručvajuć na dzień da ścienak, tolki na noč viartuchaj ich adkručvaje. Siadziš ceły dzień na mietaličnym zedliku 20 na 20, jon urazajecca ŭ dupu, u mianie tam, mabyć, užo kvadrat.

Haračuju i chałodnuju vadu ŭ ŠIZA ŭvohule adklučyli. Tolki raz na sutki davali litr chałodnaj vady, kab papić, i litr, kab zmyć «taŭčok» i paprać trusy.

U zvyčajnaj kamiery na CIPie, dzie dasidžvała apošnija piać sutak, nie było tolki haračaj vady.

Tryccać sutak mianie nie vadzili ŭ duš. Hrabieńčyka nie davali, va ŭsich zabirali rasčoski praź mianie. Tolki ŭčora pryjšła niejkaja staraja baba z hrebniem, dyk ja ŭpieršyniu schavałasia i hałavu rasčasała.

Dla mianie dzivam stała, što siońnia vypuścili: ja nastrojvałasia siadzieć dalej ci to 13, ci to 28 sutak. Jašče navat nie zrazumieła. Ja navat da kryminalnaj spravy była padrychtavanaja ŭnutrana.

Vielmi chałodna było nočču. Viadoma, nie davali ni koŭdry, ni matracaŭ. I tym, chto byŭ z nami, taksama nie davali paścieli, kab jany palityčnych usprymali nie duža dobra. Pieradačy byli tolki ŭčora i tydzień tamu.

U mianie byŭ mocny branchit, lačyli antybijotykami praz akienca i navat prasłuchoŭvali kolki razoŭ. Daktary ničoha, pretenzij nie maju. Chacia jany taksama śviedki hetych represij. Doktarka chacieła pavieści mianie na zdymak, ale tam nie dali. Na dadzieny momant adčuvaju siabie dobra.

Uvieś čas trymaŭsia cisk u mianie, choć ja hipatonik. Ja pieršyja piać nočaŭ uvohule nie spała i nie jeła. Kali ŭžo stała hublać prytomnaść, pačalisia hluki, to tady pamaliłasia i na nastupny dzień pryjšła ŭ siabie. Potym stała ŭžo zasynać ad stomlenaści.

U kamiery nasuprać štonoč kryčała armianka, jakaja žyvie dzieści za miažoj. Dniom jana spała, a načami niema kryčała, dla jaje heta byŭ šok. Niemahčyma było spać, ja kazała, vy čałavieka zabjacie, u jaje insult budzie, ratujcie. Praz 10 dzion jaje zabrali.

Na vulicu stali vyvodzić tolki na 23-ja sutki, na paŭhadziny. U ŠIZA vokny, viadoma, byli začynienyja. Dla mianie ŠIZA ŭpieršyniu, taki novy dośvied. Knih nie dali, akularaŭ, ničoha. Dobra, što nie raździeli dahała», — raskazała Volha Nikałajčyk.

Nikałajčyk była zatrymanaja za ŭdzieł u pieradvybarčym pikiecie 7 červienia, jaki prachodziŭ la Kamaroŭskaha rynku. Na nastupny dzień sudździa Pieršamajskaha suda Nastaśsia Lajkoŭskaja asudziła jaje na 15 sutak aryštu. 

Jašče pa 15 sutak spadarynia Nikałajčyk atrymała za udzieł u zbory podpisaŭ na Kamaroŭcy 30 i 31 maja. A da 13 sutak jana była asudžanaja za ŭdzieł u strymie Siarhieja Cichanoŭskaha, jaki adbyvaŭsia jašče ŭ sakaviku la Nacyjanalnaj biblijateki. 

Volzie Nikałajčyk 51 hod, jana rodam ź Minska. Blizkaja da kampanii «Jeŭrapiejskaja Biełaruś», a taksama «Narodnaj hramady» Mikałaja Statkieviča. Sprabavała zarehistravać svaju inicyjatyŭnuju hrupu na vyłučeńnie kandydatkaj u prezidenty.

• 0
• 0
• 0
• 0
• 0
• 0
• 0
• 0