U kantekście pravilnaha charčavańnia ŭsio čaściej zhadvajecca arachisavaja pasta. Hety pradukt ličycca vielmi kałaryjnym, ale ŭ toj ža čas karysnym dla arhanizma. Ale ci nasamreč heta tak?
Jość mnoha dokazaŭ tamu, što sami arechi prynosiać šmat karyści. U ich šmat klatčatki i karysnych tłuščaŭ, jakija źnižajuć ryzyku sardečna-sasudzistych zachvorvańniaŭ i raku.
Tamu vyniki daśledavańnia, praviedzienaha ŭ 2019 hodzie, mohuć padacca niečakanymi, bo arachisavaja pasta nie vyjaviła takich pieravah dla zdaroŭja, piša BBC.
Kali daśledčyki vyvučali asablivaści charčavańnia bolš za paŭmiljona čałaviek, jany vyśvietlili, što tolki cełyja arechi majuć suviaź z bolš nizkaj ryzykaj raźvićcia raku, reśpiratornych i sardečnych zachvorvańniaŭ, čaho nielha było skazać pra arachisavuju pastu.
Adno z tłumačeńniaŭ zaklučajecca ŭ tym, što ludzi, jakija addajuć pieravahu cełym arecham, mohuć jeści ich roznyja vidy i atrymlivać raznastajnyja vitaminy i minierały, jakich niama ŭ arachisavaj paście. Sprava ŭ tym, što kožny vid arechaŭ maje roznyja pažyŭnyja rečyvy. Naprykład, u mindali bolš kalcyju, a ŭ arachisie — folijevaj kisłaty.
Raniejšaje daśledavańnie 2015 hoda pakazała, što ŭžyvańnie arechaŭ źnižaje ryzyku raźvićcia dyjabietu, u toj čas jak arachisavaja pasta — nie.
Usie vyvučeńni pakazvajuć, što jość roźnica dla arhanizma pamiž spažyvańniem cełych arechaŭ i arechavaj pasty.
Tym nie mienš, arechavaja pasta taksama moža prynieści karyść arhanizmu. Varta tolki viedać, jak pravilna jaje vybirać.
Viadoma, što čym mienš ježa apracoŭvajecca, tym bolš jana karysnaja. Adnak praces pieraŭtvareńnia arechaŭ u pastu, jaki ŭklučaje absmažvańnie, błanšavańnie i pieracirańnie, minimalny, kaža Kievin Uiłan (Kevin Whelan), prafiesar dyjetałohii ŭ Karaleŭskim kaledžy Łondana.
«Praces apracoŭki źmianšaje kolkaść klatčatki, ale nie krytyčna», — kaža ekśpiert.
Apracoŭka robić arechavuju pastu bolš kałaryjnaj, ale ŭ toj ža čas pasta maje bolš pažyŭnych rečyvaŭ, jakija arhanizm nie zasvojvaje ŭ celnych arechach. Drabnieńnie arechaŭ razburaje kletki, ź jakich vyzvalajucca karysnyja tłuščy. Čym bolš hładkaja pasta, tym bolš u joj karysnych rečyvaŭ.
U toj ža čas bolšaść arechavych past majuć u svaim składzie dadatkovyja inhrydyjenty, takija jak sol, cukar abo palmavy alej. Dyjetołahi miarkujuć, što kab vyznačyć, jakaja arechavaja pasta lepšaja, treba pahladzieć, što ŭ jaje dadajuć. Čym mienš dadatkovych inhrydyjentaŭ, tym bolš u paście rečyvaŭ, jakija majuć cełyja arechi.
Arechi karysnyja dla serca, ale ŭ spałučeńni z sollu heta karyść źnikaje, što važna mieć na ŭvazie padčas vybaru arechavaj pasty.
Jašče adna detal, na jakuju varta źviarnuć uvahu, — z celnych ci z błanšavanych arechaŭ zroblena pasta. Pasta z celnych arechaŭ uklučaje ŭ siabie jašče i łupinu arechaŭ, a heta značyć, što ŭ paście bolš klatčatki.
Ciapier čytajuć
«U majho 21 santymietr — dziesiać bazavych dali». Biełarusy ŭ tyktoku žartujuć z novych praviłaŭ ad čynoŭnikaŭ7
Kamientary