Historyja Kryścijana Eryksana: što moža vyklikać raptoŭnaje spynieńnie serca?
Dacki futbalist Kryścijan Eryksan mieŭsia hulać na futbolnym čempijanacie Jeŭropy, ale zamiest hetaha jon užo niekalki dzion znachodzicca ŭ špitali. Pryčyna — raptoŭnaje spynieńnie serca Eryksana padčas matču ź Finlandyjaj u niadzielu.
Fota thenational.scot.
Miascovyja daktary ŭsio jašče nie viedajuć, što vyklikała spynieńnie serca hulca. Znajści adkaz na hetaje pytańnie — ich hałoŭnaja zadača zaraz, piša VVS.
Raptoŭnaje spynieńnie serca — źjava, kali serca niečakana pierastaje pampavać kroŭ, praz što mozh pakutuje ad niedachopu kisłarodu i, u vyniku, čałaviek hublaje prytomnaść i pierastaje dychać. Heta adroźnivajecca ad sardečnaha prystupu, kali pierapyniajecca ciačeńnie kryvi ŭ sardečnuju myšcu. Časta heta zdarajecca praz najaŭnaść tromba ŭ adnoj z karanarnych arteryj.
Adna z najbolš častych pryčyn takoj źjavy — niebiaśpiečnaja dla žyćcia arytmija, tak zvanaja fibrylacyja žałudačkaŭ. Siarod inšych pryčyn nazyvajuć kardyjamijapatyju — hrupu chvarob sardečnaj myšcy, jakija ŭpłyvajuć na jaje pamier, formu i taŭščyniu, i vostry mijakardyt, ci zapaleńnie sardečnaj myšcy.
Eryksan — nie adziny futbalist, ź jakim zdaryłasia raptoŭnaje spynieńnie serca. U 2012 hodzie inšy hulec, Fabrys Muamba, zhubiŭ prytomnaść na pole, i jaho serca spyniłasia na 78 chvilin. 28-hadovy kamierunski paŭabaronca Mark-Vivjen Foe pamior padčas matču za nacyjanalnuju kamandu va ŭzroście 28 hadoŭ, a były anhlijski futbalist Uha Echijohu, jaki pracavaŭ u trenierskim štabie «Totenchema», pamior ad raptoŭnaha spynieńnia serca, kali jamu było 44.
Raptoŭnaje spynieńnie serca moža zdarycca ź lubym čałaviekam u luby čas. Kali heta zdaryłasia z Kryścijanam Eryksanam, nad im adrazu pačali pravodzić sardečna-lohačnuju reanimacyju, to-bok zakryty masaž serca i štučnaje dychańnie. Paśla hetaha miedyki prymianili aŭtamatyčny źniešni defibrylatar.
Važna viedać, što vykanańnie sardečna-lohačnaj reanimacyi ŭ niekatorych vypadkach moža bolš čym u dva razy pavialičyć šansy čałavieka vyžyć. Kožnaja chvilina pramarudžvańnia ŭ takich situacyjach źnižaje hetyja šansy na 10%.
Što datyčycca defibrylataraŭ, u jeŭrapiejskich haradach ich raźmiaščajuć na pracoŭnych miescach, a taksama ŭ łakacyjach nakštałt aeraportaŭ i handlovych centraŭ. Pry vykarystańni aŭtamatyčnaha defibrylatara nielha pamylicca, bo prybor sam vyznačaje, ci nieabchodny sercu čałavieka impuls elektryčnaha toku.
Kamientary