Čamu biełaruskija ŭłady nie zasielać mihrantaŭ u časovy prytułak? Spytali ŭ ich samich
Biełaruskija čynoŭniki i deputaty krytykujuć polski bok za biazdušnaść u adnosinach da mihrantaŭ, jakija vymušany načavać na choładzie na miažy razam z małymi dziećmi. Ale farmalna mihranty pakul znachodziacca na biełaruskaj terytoryi. Čamu b nie prapanavać im miesca pad dacham i nie zasialić časova ŭ internat? Spytali pra heta ŭ vykankama, deputata, pradstaŭnikoŭ humanitarnaj arhanizacyi i AAN.
My pacikavilisia ŭ Hrodzienskim abłvykankamie, jakuju dapamohu jany akazvajuć mihrantam na miažy. U pryjomnaj kiraŭnika spraŭ adkazali, što takija pytańni nie da ich — hetym zajmajecca ŭpraŭleńnie ŭnutranych spraŭ vobłaści.
Biełaruski Čyrvony Kryž učora i siońnia byŭ u pryhraničnaj zonie i vydavaŭ mihrantam humanitarnuju dapamohu. Heta pitnaja vada, chleb, kiłbasy, tušonka, prysmaki, jabłyki, a taksama ciopłaje adzieńnie, koŭdry i hihijeničnyja nabory.
Ci źviartałasia arhanizacyja da miascovych uładaŭ z prapanovaj źmiaścić ludziej na čas chaładoŭ u prytułak?
«Pa pytańni ich źmiaščeńnia dakładnaj infarmacyi niama. Pytańnie kompleksnaje i patrabuje prapracoŭki, kaardynacyi sił i resursaŭ jak našych, tak i našych partnioraŭ.
Na hety momant my reahujem na biahučyja žyćciovyja patreby ludziej, jakija znachodziacca na miažy», — prakamientavali ŭ pres-słužbie.
A što deputaty? My nabrali Aleha Hajdukieviča.
— Ja dva dni budu ŭ Hrodnie zaŭtra-paślazaŭtra, chaču asabista vyvučyć situacyju na miažy.
— Vy tolki pahavaryć ci dapamohu pieradać?
— I dapamohu. Partyja viazie jaje. I heta nie pieršy raz, my zaŭsiody dapamahali. Ciopłaje adzieńnie, małako — viaziom, što možam.
— Vy jak deputat nie padymali pytańnie, kab ludziej zasialić časova?
— Tak jany nie chočuć! Jany chočuć tudy, u Hiermaniju. Treba terminova adkryvać humanitarny kalidor i zapuskać ich, jak naležyć. Jany nie chočuć žyć u Biełarusi! Kali b chacieli, ich by ŭžo daŭno zasialili.
Deputat vykazaŭsia taksama nakont mierkavańniaŭ, što ŭłady šantažujuć Zachad mihranckim kryzisam.
«Samy vialiki mif, što my chočam niejkich pieramoŭ dabicca. Nijakich pieramoŭ — zapomnicie maje słovy — ź luboj krainaj Jeŭropy pa ŭnutranym paradku Biełarusi nikoli nie budzie. Ni praź miesiac, ni praz hod, ni praz dva.
Unutranuju paviestku my budziem abmiarkoŭvaŭć tolki z narodam Biełarusi. Inšy dyjałoh budzie — budziem abmiarkoŭvać mihracyju, źniešniuju palityku, ekałohiju. Unutranyja pytańni — zabudźciesia!»
A hetym časam. Jak reahuje na mihrancki kryzis pradstaŭnictva AAN u Biełarusi?
U AAN jość cełaje Ahienctva pa spravach biežancaŭ. Mahčyma, AAN niejkim čynam dapamahaje palepšyć stan mihrantaŭ? Naprykład, zaklikaje Biełaruś pryniać ich i dapamahčy ź lehalizacyjaj? My źviarnulisia adrazu da niekalkich pradstaŭnikoŭ AAN, što ŭpaŭnavažanyja mieć znosiny z žurnalistami.
Adzin śpiecyjalist paviedamiŭ, što zaraz hetym pytańniem zajmajecca pradstaŭnictva ŭpraŭleńnia Viarchoŭnaha kamisara AAN pa spravach biežancaŭ. Druhi adkazaŭ, što «padobny kamientar moža dać tolki aficyjny pradstaŭnik ofisa ŭ Vienie».
U pradstaŭnictvie Upraŭleńnia Viarchoŭnaha kamisara AAN naš zapyt praihnaravali. Miž tym na sajcie arhanizacyi apošniaja navina datujecca 1 vieraśnia.
U toj samaj navinie majecca kamientar pradstaŭnika UVKB AAN u Biełarusi Mamo Mułusieu ŭ suviazi z pajezdkaj na ŭčastak miažy pamiežnaj zastavy «Rusaki» Haradzienskaj pahraničnaj hrupy:
«Składanaści, vyklikanyja dadzienaj situacyjaj vidavočnyja, adnak nieadkładnaje rašeńnie taksama nieabchodna.
Varta dać mahčymaść pieradačy nieabchodnaj dapamohi ludziam, jakija znachodziacca na miažy, arhanizavać kansultavańnie, a taksama vyznačyć mahčymyja šlachi vyrašeńnia ŭ adpaviednaści ź isnujučymi mižnarodnymi abaviazacielstvami i prymajučy da ŭvahi roznyja indyvidualnyja abstaviny členaŭ hrupy.
UVKB AAN zaklikaje ŭsie załučanyja baki, u tym liku i samich členaŭ hetaj hrupy, jakaja znachodzicca na miažy, uzajemadziejničać dziela taho, kab dapamahčy vyrašyć situacyju ŭ adpaviednaści z normami mižnarodnaha prava biežancaŭ i humanitarnymi pryncypami.
UVKB AAN hatova akazać dadatkovuju padtrymku ŭładam z abodvuch bakoŭ miažy. Adnak zaklikaje ich da praciahu dyjałohu, nakiravanaha na pošuk realnych rašeńniaŭ dla tych mužčyn, žančyn i dziaciej, jakija zaraz znachodziacca na miažy, u adpaviednaści ź ich situacyjaj».
Čytajcie taksama:
Kačanava śćviardžaje, što mihranty trapili ŭ Biełaruś pa biaźvizie. Ale pa zakonie heta niemahčyma
Jakija biełaruskija zakony parušajuć mihranty ŭ pamiežnaj zonie? Raźbirajemsia
«Poŭnaja devalvacyja zakonaŭ i prysiahi». Dziejny pahraničnik pra situacyju na biełaruska-polskaj miažy
Ciapier čytajuć
28‑hadovy biełarus pajechaŭ u Rasiju i ažaniŭsia. Adrazu zavierbavaŭsia na vajnu, pavajavaŭ miesiac — i zahinuŭ1
28‑hadovy biełarus pajechaŭ u Rasiju i ažaniŭsia. Adrazu zavierbavaŭsia na vajnu, pavajavaŭ miesiac — i zahinuŭ
«Ja ich ni pra što nie prasiŭ i tym bolš — vysyłać mianie z radzimy». Departavanyja palitviaźni rezka adkazali Kavaleŭskamu. Nie abyšłosia biez abrazaŭ4444
Kamientary