Apublikavali prajekt źmien u Kanstytucyju Biełarusi. Što tam novaha?
Na sajcie Nacyjanalnaha pravavoha internet-partała abnarodavany prajekt źmianieńniaŭ i dapaŭnieńniaŭ u Kanstytucyju Respubliki Biełaruś dla «ŭsienarodnaha abmierkavańnia». Pakul data refierendumu nie vyznačanaja, ale miarkujecca, što jon projdzie naprykancy lutaha.
Sa źmienaŭ, jakija adrazu kidajucca ŭ vočy i pra jakija nie raz kazali, — heta źjaŭleńnie novaha vybarnaha orhana, Usiebiełaruskaha narodnaha schodu. Zhodna z prajektam novaj Kanstytucyi, jon budzie źbiracca raz na hod. Ahulnaja kolkaść členaŭ UNS moža dasiahać 1200 čałaviek.
UNS zmoža pryznavać ci nie pryznavać vybary, uvodzić nadzvyčajnaje stanovišča, a taksama vybirać sudździaŭ Kanstytucyjnaha suda i hetak dalej.
Taksama ŭ prajekcie pavysili minimalny ŭzrost prezidenta i ŭviali dadatkovyja abmiežavańni. Tak, pa novaj Kanstytucyi prezidentam zmoža być:
- hramadzianin Respubliki Biełaruś pa naradžeńni,
- nie maładziejšy za 40 hadoŭ, jaki vałodaje vybarčym pravam,
- jaki pastajanna pražyvaje ŭ Biełarusi nie mienš za 20 hadoŭ niepasredna pierad vybarami,
- jaki nie maje i nie mieŭ raniej hramadzianstva zamiežnaj dziaržavy abo dazvołu na žycharstva abo inšaha dakumienta zamiežnaj dziaržavy, što daje prava na lhoty i inšyja pieravahi.
Taksama zhodna z prajektam, prezident abirajecca terminam na piać hadoŭ, adna i taja ž asoba nie moža być prezidentam bolš za dva terminy.
Asobna ŭ artykule 89 prapisana, što prezident, jaki spyniŭ vykanańnie svaich paŭnamoctvaŭ, vałodaje niedatykalnaściu i «nie moža być pryciahnuty da adkaznaści za dziejańni ŭ suviazi z ažyćciaŭleńniem im prezidenckich paŭnamoctvaŭ».
Dadatkova adznačajecca, što prezident, jaki spyniŭ vykanańnie svaich paŭnamoctvaŭ, pažyćciova stanovicca členam Savieta Respubliki, a taksama źjaŭlajecca delehatam Usiebiełaruskaha narodnaha schodu.
Taksama ŭ prajekcie prybrali z artykuła 18 frazu pra toje, što «Biełaruś stavić metaj zrabić svaju terytoryju biaźjadziernaj zonaj, a dziaržavu — niejtralnaj».
Z prajektam možna aznajomicca pa spasyłcy.
Mierkavańni hramadzian pa prajekcie źmianieńniaŭ i dapaŭnieńniaŭ u Kanstytucyju Respubliki Biełaruś, a taksama mahčymyja prapanovy nakiroŭvajuć u Nacyjanalny Centr pravavoj infarmacyi:
pa elektronnaj pošcie sbor@ncpi.gov.by;
z dapamohaj zapaŭnieńnia elektronnaj formy, jakaja znachodzicca na Nacyjanalnym pravavym internet-partale pa adrasie https://sbor.pravo.by;
u piśmovym vyhladzie pa adrasie: 220030, h. Minsk, vuł. Biersana, 1a, NCPI, z paznakaj «Kanstytucyja».
«Šynvize — končany sadyst». Adzin z adyjoznych načalnikaŭ kałonii Babrujska pierabraŭsia ŭ Hiermaniju28
Kamientary