Departamient finansavych rasśledavańniaŭ śćviardžaje, što miedcentr 10 hadoŭ pravodziŭ artapiedyčnyja apieracyi bieź licenzii ŭ apieracyjnym adździaleńni na vulicy Biechcierava ŭ Minsku, havorycca ŭ paviedamleńni Kamiteta dziaržaŭnaha kantrolu (KDK).
KDK śćviardžaje, što kiraŭnictva miedcentra viedała pra adsutnaść dazvołu na praviadzieńnie artapiedyčnych apieracyj, «adnak z metaj atrymańnia dadatkovaha prybytku na aficyjnym sajcie miedcentra raźmiaščałasia infarmacyja pra toje, što centram ažyćciaŭlajucca takija apieracyi».
Tak tłumačać praviadzieńnie pravierki ŭ miedycynskim centry i zatrymańnie jaho zasnavalnika Dźmitryja Sajkova.
«Dla nadańnia zakonnaści takim apieracyjam i ŭtojvańnia infarmacyi ab ich praviadzieńni (…) artapiedyčnyja apieracyi byli ŭklučanyja ŭ prejskurant i pravodzilisia pa rachunkach jak zvyčajnyja chirurhičnyja», — śćviardžaje KDK.
«Rabotnikami orhanaŭ finansavych rasśledavańniaŭ praviedzienyja ahlady pamiaškańniaŭ miedycynskaha centra i vyjaŭlenyja dakumienty, ličbavyja nośbity, čarnavyja zapisy, jakija paćviardžajuć praviadzieńnie artapiedyčnych apieracyj. Taksama ŭstanoŭlena, što miedycynski piersanał miedcentra «Nardzin» dva miesiacy tamu (paśla pačatku praviadzieńnia Kamitetam dziaržkantrolu manitorynhaŭ u miedycynskich centrach) byŭ papiaredžany kiraŭnictvam ab nieabchodnaści adkazvać admoŭna, kali buduć vypadki zvarotu klijentaŭ pa pytańniach praviadzieńnia apieracyj u artapiedaŭ.
U chodzie ahladaŭ ustanoŭlena, što apieracyjnaje adździaleńnie miedycynskaha centra pa svaich charaktarystykach i paramietrach nie adpaviadała patrabavańniam Ministerstva achovy zdaroŭja dla akazańnia ŭ im artapiedyčnych apieracyj, u suviazi z čym nie byŭ atrymany śpiecyjalny dazvoł (licenzija)», — abvinavačvaje Dziaržkantrol.
Taksama KDK śćviardžaje, što jość fakty ŭchileńnia ad vypłaty padatkaŭ uładalnikami miedycynskaha centra na sumu bolš za 500 tysiač rubloŭ. «Jany pryznali vinu i hatovyja pahasić škodu biudžetu», — piša Dziaržkantrol.
Dziaržkantrol abvinavačvaje pryvatnyja miedcentry i ŭ zavyšeńni cenaŭ.
«U cełym, vyvučeńnie situacyi ŭ pryvatnych miedcentrach pakazała, što ŭ ich dziejnaści majucca parušeńni pa cenaŭtvareńni na pasłuhi i fakty naviazvańnia pasłuh. Tak, miedcentry pradastaŭlajuć kompleksnyja pasłuhi pa dyjahnostycy, u jakija ŭklučana niekalki vidaŭ daśledavańniaŭ, pry hetym pry farmavańni koštu hetych daśledavańniaŭ ažyćciaŭlajecca dublavańnie manipulacyj (u košt pasłuhi nieabhruntavana niekalki razoŭ uklučajucca adny i tyja ž manipulacyi).
Z metaj abarony pravoŭ pacyjentaŭ Kamitet dziaržkantrolu nakiravaŭ miedcentram rekamiendacyi z patrabavańniem pieraličyć košt zavyšanych pasłuh, a taksama dać hramadzianam prava vybaru pasłuh biez naviazvańnia niepatrebnych daśledavańniaŭ, kansultacyj i pracedur», — piša KDK.
«Asobnymi kamiercyjnymi miedcentrami apieratyŭna pryniatyja miery pa vykanańni hetych rekamiendacyj, — śćviardžajuć kantralory, pry hetym nie nazyvajuć hetyja centry.
— Da prykładu, miedcentram u Breście za košt vyklučeńnia dublujučych manipulacyj u siarednim na 15—20% źnižany košt praviadzieńnia kompleksnych daśledavańniaŭ MRT i asobnych vidaŭ UHD. Pryniatyja miery pa źnižeńni koštu pasłuh minskim miedcentram: źnižany košt (na 10—12%) na ŭsie vidy kompleksnych daśledavańniaŭ MRT i košt renthienałahičnych daśledavańniaŭ (da 40%). Inšym miedycynskim centram u Minsku źnižany košt pasłuhi pry vykanańni kambinavanych UHD (u siarednim na 14%).
Kamitet dziaržkantrolu paviadzie vybaračny manitorynh miedcentraŭ i vyvučyć, nakolki vyčarpalna imi pryniatyja miery pa niedapuščalnaści nieabhruntavanaha zavyšeńnia cen (u pieršuju čarhu za košt dublavańnia manipulacyj i rabot) i vyklučeńnia naviazvańnia pasłuh».
Nahadajem, što supracoŭniki DFR pryjšli ŭ «Nardzin» na minułym tydni. Jany kanfiskavali dakumientacyju kampanii, a jaje zasnavalnika i dyrektara, viadomaha psichaterapieŭta i narkołaha Dźmitryja Sajkova i jaho žonku zatrymali, adnak viečaram adpuścili. Raniej była prypynienaja dziejnaść miedcentra «Łade».
Pavodle acenak ludziej ź miedycynskaj śfiery, apytanych «Našaj Nivaj», padstavy dla rejdaŭ nadumanyja, a sapraŭdnaja pryčyna — u namiery pieradziełu śfiery miedyčnych pasłuh na karyść struktur, nabližanych da Alaksandra Łukašenki, jaho siamji i asobnych čynoŭnikaŭ.
Razam z tym, havorka idzie pra pakarańnie za prajavy salidarnaści ŭ 2020-m i žadańnie sabrać «vykup» u vyhladzie štrafaŭ.
Čytajcie taksama: «Łade» kašmarać za 2020-y. Vychavaŭčy rekiet, vystavili štraf
«Vyhladaje, jak začystka rynku na karyść «svajoj» pryvatnaj miedycyny». Što staić za pahromam miedcentraŭ
Ciapier čytajuć
Anžalika Mielnikava tydzień praviała na Šry-Łancy i vylecieła ź dziećmi ŭ Dubaj36
Anžalika Mielnikava tydzień praviała na Šry-Łancy i vylecieła ź dziećmi ŭ Dubaj
Doktarku Alenu Mikałajevu padčas vajny adpravili na Vaładarku za dapamohu habrejam — u XXI stahodździ tam ža apyniecca jaje praŭnučka Maryna Zołatava33
Kamientary