Apytanyja «Našaj Nivaj» dziejnyja dypłamaty i ludzi ź sistemy ličać, što Siarhiej Alejnik — najlepšaja fihura na pasadu ministra zamiežnych spraŭ u ciapierašniaj situacyi. Ale, jak toj kazaŭ, jość niuansy.
«Alejnik — heta najlepšy siabra Makieja. Nie tolki ŭ viedamstvie, ale i pa žyćci. Jon razumieje łohiku taho, što rabiŭ Makiej, jon nie budzie vydumlać novaha. Jon viedaje Ministerstva zamiežnych spraŭ, pracuje tam z 1992-ha, adpaviedna, za hety čas vyvučyŭ litaralna ŭsich supracoŭnikaŭ, a mnohich i sam pryvodziŭ na rabotu.
Adpaviedna, małajmavierna, što zaraz u MZS raspačniecca novaje palavańnie na viedźmaŭ, małajmavierna, što narod pačnuć zvalniać, a na ich miesca nabirać ludziej ź inšych trochlitarnych struktur — usio zastaniecca, jak było», — skazaŭ adzin z našych surazmoŭcaŭ.
Padobnaj dumki trymajecca i inšy surazmoŭca z kołaŭ MZS.
«Absalutny pierajemnik, čałaviek Makieja, najbližejšy siabar, jaki mieŭ dostup da idej Makieja i abmiarkoŭvaŭ ich ź im. U MZS ničoha mianiacca nie budzie, kurs budzie praciahvacca — ni čystak my nie ŭbačym, ni novych idej nie pačujem. Alejnik — heta čałaviek zdolny, najlepšaje, što maje sučasny MZS na top-pazicyjach, inšyja asoby, jakija «Našaj Nivaj» nazyvalisia, byli pa svaich prafiesijnych jakaściach horšymi», — skazaŭ inšy dypłamat.
Viesternizavany kanjunkturščyk
«Choć i kanjunkturščyk, ale viesternizavany kanjunkturščyk, što choć u niejkim sensie pazityŭna na fonie ŭsieahulnaj kadravaj depresii ŭ sistemie», — dadaŭ inšy surazmoŭca.
«Kaniečnie, nijakaha razmarožvańnia ciapier być nie moža. Naŭrad ci Alejnik voźmie i pierakanaje Łukašenku vyvieści rasijskija vojski z terytoryi Biełarusi ci vypuścić palityčnych.
Ale ŭ teoryi, dla momantu, kali budzie patrebna pasiarednickaja misija, Alejnik budzie samym spraktykavanym kandydatam — jon bolš za dziesiacihodździe byŭ ambasadaram pry Vatykanie. Nie viedaju, ci jamu tam ciapier daviarajuć, ale dakładna viedajuć.
A Vatykan — samy imavierny pasiarednik, kali dapuścić realnaść niejkaj chvali razmarožvańnia ŭ adnosinach režymu i Zachadu.
Astatnija kantakty Alejnika zhublenyja, u Łondanie jaho słuchać nie buduć, mnie zdajecca. U Ženievie taksama», — dadaŭ inšy dypłamat.
«Nie psich»
A što viadoma pra Alejnika jak čałavieka?
«Jon spakojny i nie psich. Nie pavyšaje hołas, kali havoryć z padnačalenymi, taki «čałaviečny čałaviek».
Taksama jon biełarus, chacia jak šmat dla jaho značyć Biełaruś — ciažka skazać. Jaŭna mienš, čym dla mnohich inšych sumlennych ludziej. Ale jon i nie ruski. Taki naš tutejšy słužaka, karjeryst», — takuju charaktarystyku daŭ inšy znajomy z Alejnikam.
Jaki baćka, taki syn
Syn dypłamata, Alaksandr Alejnik, amal 10 hadoŭ pracuje ŭ Fiederacyi futboła. Skončyŭ Linhvistyčny — jak i tata, viedaje niamieckuju i anhlijskuju movy. Jon delehat UEFA — naviedvaje mižnarodnyja matčy, sočyć za adpaviednaściu Statutu i adpraŭlaje spravazdačy ŭ hałoŭny ofis.
Paśla prychodu Uładzimira Bazanava na miesca Siarhieja Rumasa syna mocna hnabili ŭ nadziei vykinuć z prybytkovaha miesca, ale viartańnie baćki ŭ Minsk na pasadu namieśnika ministra hety praces prypyniła.
Pa słovach našych surazmoŭcaŭ z kalafutbolnych kołaŭ, syn maryć syści na rabotu va UEFA, skončyŭ niekalki ichnich kursaŭ, ale ciapier biełarusaŭ i ruskich tudy nie biaruć.
Syna adnosiać da ludziej składu jahonaha ž baćki: palityčnuju pazicyju jon nijak nie vyjaŭlaŭ.
Abychod sankcyj i lehitymizacyja režymu
Analizujučy pole raboty, jakoje rasścialiłasia pierad Alejnikam paśla sychodu Makieja, našy surazmoŭcy ź sistemy ličać, što niešta ŭ Alejnika atrymajecca, a niešta — nie ŭ jaho siłach.
«U zamiežnaj palitycy ciapier dva hałoŭnyja kirunki dziejnaści: ekanamičny — pošuk partnioraŭ dla abychodu sankcyj, i palityčny — sproba lehitymizacyi režymu Łukašenki i źmiakčeńnia staŭleńnia da jaho z boku raźvitych krain, — kaža surazmoŭca «Našaj Nivy».
— Dla vykanańnia abiedźviuch zadač, u pryncypie, chacia i bieź nijakich harantyj na pośpiech Alejnik pasuje.
Pasłužny śpis u jaho z vynikami: u Brytanii jon zrabiŭ sabie imia, atrymaŭ padychod da prynca Kienckaha, pryvoziŭ jaho ŭ Biełaruś, a Makieju, adpaviedna, arhanizoŭvaŭ pajezdku ŭ Łondan.
U Łondanie jaho pryznavali najlepšym zamiežnym dypłamatam ad jeŭrazijskaha rehijona ŭ 2018-m. Kantakty z Brytanijaj za čas jahonaj kadencyi značna palepšali.
U peŭnyja hody kadencyi Alejnika Brytanija była ŭ top-3 handlovych partnioraŭ Biełarusi, chacia i nie biez schiemaŭ z naftapraduktami.
Jon šmat zajmaŭsia naviadzieńniem ekanamičnych mastoŭ. Jaŭna, što abros kantaktami jak i sumlennych biznesmienaŭ, tak i žulikaŭ, jakija šukajuć vyhadu ź luboj situacyi. Heta spatrebicca ŭ naładžvańni sistemnych pracesaŭ dla abychodu sankcyj, bo pakul što kožny ŭ Biełarusi vajuje sam za siabie ŭ płanie pošuku sankcyjnych tavaraŭ.
Pa linii Jeŭrapiejskaha banka rekanstrukcyi i raźvićcia jon damaŭlaŭsia ab miljardnych linijach padtrymki na darohi i infrastrukturu ŭ Biełarusi.
Pry narmalnaj sistemie, kali b Alejnik słužyŭ narmalnaj uładzie, jon by prynios narodu šmat karyści. A siońnia jon źviazany pa rukach i nahach, budzie rabić toje, što naradžajecca ŭ tym kabiniecie, u jakim jaho siońnia prymali.
A voś što ŭ jaho atrymajecca niešta na Zachadzie, u palityčnym kirunku raboty, — heta sumnieŭna», — miarkuje surazmoŭca «Našaj Nivy».
«Ministerstva zamiežnych spraŭ i ŭsia Biełaruś siońnia ŭ zakładnikach palityki dyktataraŭ, takoje lečycca nie dypłamatami ŭ halštukach i nie na karaleŭskich pryjomach. Škada Alejnika jak śpiecyjalista, u niejkim sensie», — dadaŭ surazmoŭca.
«Naša Niva» — bastyjon biełaruščyny
PADTRYMAĆ
Kamientary