Padzieńnie viertalota z kiraŭnictvam MUS pad Kijevam: viersija dyviersii nie paćvierdziłasia
Viersija dyviersii ŭ avijakatastrofie viertalota ŭ Bravarach Kijeŭskaj vobłaści 18 studzienia, padčas jakoj zahinuła kiraŭnictva MUS, nie paćvierdziłasia, vysnovy dasudovaha rasśledavańnia buduć paviedamlenyja ŭ najbližejšy čas. Pra heta hienieralny prakuror Ukrainy Andrej Kościn zajaviŭ u intervju ahienctvu «Ukrinform».
«Papiarednie mahu skazać, što viersii, źviazanyja z dyviersijaj abo zamacham na žyćcio dziaržaŭnych dziejačaŭ [adnosna avijakatastrofy ŭ Bravarach], nie znajšli svajho paćviardžeńnia. Ab kančatkovych vysnovach pa vynikach dasudovaha rasśledavańnia my paviedamim u najbližejšy čas», — skazaŭ jon.
Kościn nahadaŭ, što ŭ pačatku rasśledavańnia było vyłučana niekalki viersij: zamach na žyćcio dziaržaŭnych dziejačaŭ, uklučajučy dyviersiju, źbivańnie latalnaha aparata, kanfliktnaja situacyja na borcie pavietranaha sudna, pamyłka piłota, techničnaja niaspraŭnaść viertalota, nienaležnaja arhanizacyja płanavańnia palotu, nievykanańnie praviłaŭ palotaŭ, składanyja ŭmovy nadvorja.
Pavodle słoŭ Andreja Kościna, rasśledavańnie praciahvajecca. Da pracy pryciahnuli śpiecyjalistaŭ kampanii Airbus Helicopters, a taksama śpiecyjalistaŭ ź Ministerstva abarony, Nacpalicyi i Nachvardyi.
18 studzienia ŭ horadzie Bravary Kijeŭskaj vobłaści pablizu dziciačaha sada ŭpaŭ viertalot, uspychnuŭ pažar. U vyniku padzieńnia zahinuli 14 čałaviek, u tym liku dzicia. Taksama zahinuła kiraŭnictva Ministerstva ŭnutranych spraŭ Ukrainy: kiraŭnik MUS Dzianis Manastyrski, jaho pieršy namieśnik Jaŭhien Jenin i dziaržaŭny sakratar MUS Juryj Łubkovič, pamočniki i achova ministra.
Kamientary