Pravaabaroncam stała viadoma, što čałaviek ź imiem Michaił Łapunoŭ byŭ aryštavany na 15 sutak i nie vyjšaŭ siońnia na volu. Takoje ž samaje imia maje baćka palitźniavolenaha Mikity Załatarova, piša «Homielskaja viasna».
Sudziŭ jaho sudździa Karmanovič Centralnaha rajona Homiela. Jon ža pastanaviŭ nie kanfiskoŭvać mabilnaha telefona Michaiła. Vynik druhoha sudu nieviadomy, ale na volu mužčyna tak i nie vyjšaŭ. Adsutničaje suviaź taksama i z žonkaj Michaiła.
Syn Michaiła — Mikita Załataroŭ — adzin z samych junych zatrymanych u vyniku pratestaŭ 2020 hoda, chvareje na epilepsiju. Jaho zatrymali 11 žniŭnia 2020 hoda, tady chłopcu było 16 hadoŭ i try miesiacy.
Jahony baćka raskazvaŭ žurnalistam, što Mikitu bili ŭ milicyi i SIZA. Na heta advakat padavaŭ skarhu, ale orhany nie znajšli składu złačynstva.
Mikitu razam ź Leanidam Kavalovym i 25-hadovym Dźmitryjem Karniejevym abvinavacili za padziei 10 žniŭnia 2020 hoda pa troch artykułach Kryminalnaha kodeksa:
- 293 (arhanizacyja masavych biesparadkaŭ);
- 295-3 (niezakonnyja dziejańni ŭ dačynieńni da pradmietaŭ, paraźlivaje dziejańnie jakich zasnavana na vykarystańni haručych rečyvaŭ);
- 364 (hvałt albo pahroza ŭžyvańnia hvałtu ŭ dačynieńni da supracoŭnikaŭ orhanaŭ unutranych spraŭ).
22 lutaha 2021 hoda sudździa Dźmitryj Deboj pakaraŭ Mikitu piaćciu hadami vychavaŭčaj kałonii. Paśla prysudu ŭ chłopca pačałasia isteryka. Jon kidaŭsia na kraty i kryčaŭ: «Vypuścicie mianie adsiul!»
Paźniej na chłopca zaviali jašče adnu kryminalnuju spravu, što jon nibyta zrabiŭ padnožku supracoŭniku kałonii, a potym schapiŭ jaho za vałasy i šyju.
Mikita pryznaŭ vinu, ale dadaŭ: «Heta byŭ nie hvałt, a supraciŭ. Abraźlivyja słovy ja vymaviŭ na emocyjach». Jamu prysudzili 1 hod i 6 miesiacaŭ kałonii ahulnaha režymu. Šlacham častkovaha składańnia raniej prysudžanaha terminu pakarańnia z novym ahulny termin pakarańnia dla Mikity skłaŭ 4 hady i 6 miesiacaŭ pazbaŭleńnia voli ŭ vychavaŭčaj kałonii.
26 červienia 2022 h. Mikitu etapavali z vychavaŭčaj kałonii № 2 u homielski SIZA-3, a paśla — u mahiloŭskuju kałoniju № 15. Na pačatku žniŭnia 2022 h. stała viadoma, što palitviaźniu źmianili režym na bolš strohi, Mikitu pieraviali z mahiloŭskaj PK № 15 u žodzinskuju turmu № 8. Chłopiec adbyvaje pakarańnie ŭ turmie strohaha režymu.
Ciapier čytajuć
Vaskrasienski: Adkryvajecca nieba — i Aleś Bialacki adrazu vychodzić31
Kamientary