Mižnarodny Čyrvony Kryž patrabuje zvolnić Šaŭcova. U vypadku admovy — spynić finansavańnie

Kamitet pa vykanańni pravavych normaŭ pravioŭ rasśledavańnie abvinavačańniaŭ, vyklikanych aficyjnymi zajavami Hienieralnaha sakratara Biełaruskaha Čyrvonaha Kryža, u tym liku ab jadziernaj zbroi i pieramiaščeńni dziaciej u Biełaruś, a taksama ŭ suviazi ź jaho vizitam u Łuhansk i Danieck.

Praŭleńnie IFRC padtrymała vysnovy i rekamiendacyi Kamiteta pa vykanańni pravavych normaŭ, zabaraniŭšy jamu zajmać choć jakija kiroŭnyja pasady ŭ arhanizacyi.

Praŭleńnie zaklikała Biełaruski Čyrvony Kryž vyzvalić Hienieralnaha sakratara Dźmitryja Šaŭcova ad pasady nie paźniej za 30 listapada 2023 hoda.

U advarotnym vypadku arhanizacyja admovicca ad novych partniorskich abaviazacielstvaŭ u dačynieńni da Biełaruskaha Čyrvonaha Kryža, u tym liku spynić finansavańnie.

Užo ŭ vieraśni stała viadoma, što Kamitet pa vykanańni pravavych normaŭ i pasiarednictva Mižnarodnaj fiederacyi tavarystvaŭ Čyrvonaha Kryža i Čyrvonaha Paŭmiesiaca parekamiendavaŭ kiraŭniku biełaruskaha adździaleńnia Dźmitryju Šaŭcovu pakinuć pasadu da 3 kastryčnika na čas praviadzieńnia rasśledavańnia. Ale jon da rekamiendacyi nie prysłuchaŭsia. Źjezd Biełaruskaha tavarystva Čyrvonaha Kryža prahałasavaŭ za praciah paŭnamoctvaŭ Dźmitryja Šaŭcova.

IFRC papiaredžvaje, što, kali Biełaruski Čyrvony Kryž nie prymie nieabchodnych dziejańniaŭ dla adchileńnia dziejnaha Hienieralnaha sakratara, siabroŭskija pravy Nacyjanalnaha tavarystva buduć aŭtamatyčna prypynieny 30 listapada 2023 hoda.

Pradstaŭnictva Čyrvonaha Kryža ŭ Biełarusi — praŭładnaja, faktyčna, psieŭdahramadskaja arhanizacyja, jakaja biezahavoračna padtrymlivaje režym Łukašenki va ŭsich jaho dziejańniach jak na słovach, tak i na spravie. Siabroŭ hetaj arhanizacyi, naprykład, zaŭsiody ŭklučajuć u skład vybarčych kamisij, i jany aktyŭna ŭdzielničajuć u falsifikacyi vybaraŭ roznaha ŭzroŭniu.

Dziejnaść arhanizacyi nie adpaviadaje takim zajaŭlenym pryncypam, jak niezaležnaść, niejtralnaść, biesstaronnaść i dobraachvotnaść.

Paśla pačatku vajny Rasii z Ukrainaj Biełaruskaje tavarystva Čyrvonaha Kryža ŭdzielničała ŭ vyvazie ŭkrainskich dziaciej z akupavanych terytoryj na terytoryju Biełarusi, hienieralny sakratar BTČK Dźmitryj Šaŭcoŭ asabista naviedvaŭ Danbas, majučy na svaim adzieńni simvał rasijskaj ahresii — łacinskuju litaru Z. Ułasna, mienavita paśla taho i ŭźnik skandał, na jaki musiŭ adreahavać navat Mižnarodny Čyrvony Kryž, zvyčajna nie vielmi pryncypovy ŭ reputacyjnych pytańniach.

Akramia taho, kiraŭnictva arhanizacyi nieadnarazova publična vykazvałasia ŭ padtrymku raźmiaščeńnia na terytoryi Biełarusi rasijskaj jadziernaj zbroi.

U toj ža čas prablemy parušeńnia pravoŭ čałavieka ŭ Biełarusi kiraŭnictva arhanizacyi zusim nie cikaviać, nie robiać jany i sprob palepšyć stanovišča palitźniavolenych u turmach režymu Łukašenki.

• 56
• 0
• 3
• 2
• 0
• 1
• 3
• 0