Nazad da kinazałaŭ i šachmataŭ? Karektavańnie rejestra arhanizataraŭ kulturnych prahram udaryła pa sanatoryjach

Z 23 kastryčnika zajmacca arhanizacyjaj kancertaŭ mohuć tolki dziaržaŭnyja ŭstanovy kultury i niekalki dziasiatkaŭ pryvatnych arhanizacyj, dla jakich kulturna-zabaŭlalnaja dziejnaść źjaŭlajecca asnoŭnaj. Z kancertnaha rejestra vyklučyli kala 50 kampanij.

Sanatoryi ciapier pavodle zakonaŭ nie mohuć być arhanizatarami kulturna-vidoviščnych mierapryjemstvaŭ, pakolki heta nie asnoŭny vid ich dziejnaści. I kali sanatoryj choča pravieści tancavalnaje šou, kancert ci prosta zaprasić vykanaŭcu, to jon abaviazany zaklučyć damovu z pryvatnymi arhanizatarami z rejestra abo dziaržustanovami kultury. Samastojna hetaha rabić ciapier nielha.

U RSTI adznačajuć, što ludziej pryvablivaje ŭ sanatoryi nie tolki lačeńnie jak takoje, ale i adpačynak u sučasnym jaho farmacie — z animacyjaj i žyvoj muzykaj. I heta ŭ apošnija hady sanatoryi imknulisia zabiaśpiečyć, starajučysia adpaviadać patrabavańniam pieradusim turystaŭ z Rasii, jakija tradycyjna składajuć asnoŭnuju bazu klijentaŭ.

«Da 23 kastryčnika našy supracoŭniki byli ŭ rejestry arhanizataraŭ kultmasavaj prahramy, ciapier pa novaj padajuć dakumienty, kab pastaracca zastacca ŭ hetym statusie. Što budzie dalej — pakul niezrazumieła», — havoryć kiraŭnik adździeła prodažaŭ sanatoryja «Alfa Radon» Leanid Zakryška. — Šukajem roznyja šlachi. My i raniej uzhadniali prahramu i artystaŭ va ŭpraŭleńni kultury Hrodzienskaha abłvykankama. A ciapier usio toje ž samaje treba rabić, ale praz pasiarednika. Heta lišniaja biurakratyja i strata času».

Pavodle Zakryški: «Našy hości pryvykli da peŭnaha ŭzroŭniu, i my nie možam ich rasčaravać, inakš stracim reputacyju i hrošy».

Taja ž prablema — i ŭ inšych sanatoryjach. Ich klijenty pryzvyčailisia, adznačajuć u RSTI, što im harantavanyja jak minimum 3 vystupleńni na tydzień, žyvaja muzyka ŭ restaranie: skrypka, hitara, saksafon, fartepijana. A ciapier uźnikajuć pytańni času na ŭzhadnieńnie zajaŭki va ŭpraŭleńni kultury abłvykankama, cany i hrafiki muzyki.

Načalnica sanatorna-azdaraŭlenčaha kompleksu «Viesta» Alena Osipava narakaje: u sanatoryjaŭ byli napracavanyja kantakty z artystami, tancorami, hrupami, što dazvalała im damovicca i ŭzhadnić usio za niekalki dzion. Ciapier ža arhanizacyja mierapryjemstvaŭ zapatrabuje jašče bolš uzhadnieńniaŭ, času i pierapłat.

Na dumku staršyni praŭleńnia RSTI Filipa Hułaha, rašeńnie ab vyklučeńni sanatoryjaŭ z rejestra arhanizataraŭ kultmierapryjemstvaŭ pamienšyć pryvabnaść turystyčnaha praduktu i ŭdaryć pa eksparcie ŭ turystyčnaj halinie.

Tamu jon prapanuje dać sanatoryjam mahčymaść nadalej praciahvać zajmacca arhanizacyjaj kulturna-masavych mierapryjemstvaŭ samastojna, asabliva va ŭmovach usio bolšaj kankurencyi z rehijonami Rasii za rasijskaha ž turysta.

U Sajuzie turindustryi ličać, što kali raniej pryniatyja rašeńni nie pierahledziać, to ŭ biełaruskich sanatoryjach moža adbycca adkat nazad, da kinazałaŭ i šachmataŭ, i tady tyja ž rasijskija turysty addaduć pieravahu adpačynku ŭ inšych miescach.

• 2
• 0
• 15
• 4
• 1
• 0
• 3
• 0