Aryhinał starejšy za kopiju amal na dźvie tysiačy hadoŭ.
Parkavaja altanka ŭ parku pry pałacy Horvataŭ u Naroŭli, jakuju časta prymajuć za majak, akazałasia paŭtareńniem pomnika staražytnarymskaj architektury — maŭzaleja Julijaŭ. Heta zaŭvažyŭ telehram-kanał «Spadčyna».
Pabudova była ŭźviedziena ŭ Hłanumie pryblizna ŭ 30-20 hadach da n. e. pradstaŭnikami ramanizavanaj halskaj siamji. Siońnia ad Hłanuma zastalisia tolki ruiny, jakija raźmieščany na samym poŭdni Francyi, niedaloka ad Avińjona.
Maŭzalej fundavali try braty, Siekst, Łucyj i Mark, syny niejkaha Haja Julija. Maŭzalej uzvodziŭsia ŭ pamiać ich baćki i dzieda. Siamja, vidać, atrymała rymskaje hramadzianstva za padtrymku, akazanuju Juliju Cezaru padčas Halskaj vajny. Raniej ličyłasia, što maŭzalej byŭ pabudavany paźniej dla plamieńnikaŭ impieratara Aŭhusta, jakija pamierli maładymi.
Pakolki pachavalnaja kamiera vyjaŭlena nie była, siońnia dakładna nie viadoma, ci sapraŭdy hetaja pabudova byli maŭzalejem, ci simvaličnaj mahiłaj — kienatafam.
Hłanumski maŭzalej vielmi padobny da maŭzaleja Istacydyjaŭ u tym ža horadzie, ale maje bolš vyciahnutyja praporcyi i bolš ciažkija abjomy.
Kubičny nižni jarus, pakryty reljefami, traktavany jak sarkafah. Nad im, padobna da ŭračystaj tryumfalnaj arki ŭ honar junych hierojaŭ, padymajecca vysoki skrazny abjom — tak zvany tetrapiłon. Kožny jaho fasad u centry prarezany arkaj.
Viančaje kruhły chram — tak zvany manoptar (kruhły chram), u jakim da XVIII st. stajali statui abodvuch Julijaŭ. Mahčyma, jon byŭ zadumany jak paminalny chram.
Hłanumski maŭzalej dobra zachavaŭsia i tamu musiŭ być viadomym jeŭrapiejskim architektaram XIX stahodździa, jakija vyvučali architekturu na kłasičnych uzorach.
Pałac Horvataŭ u Naroŭli byŭ pabudavany ŭ siaredzinie XIX stahodździa ŭ styli poźniaha kłasicyzmu. Jahony aŭtar na siońnia nie viadomy, ale viadoma, što słavuty vilenski architektar Tadevuš Rastvaroŭski, jaki mieŭ siabroŭskija i svajackija adnosiny z haspadarami siadziby, namalavaŭ eskizy scen z antyčnymi mifałahičnymi siužetami dla azdableńnia interjeraŭ. Ci nie moh jon pryŭnieści i ŭ park pry siadzibie troški antyčnych matyvaŭ?
Ramantyčnaja altanka ŭ Naroŭli, choć pierajmaje formy Hłanumskaha maŭzaleja, ale atrymałasia ramantyčna vytančanaj i ŭźniosłaj, praŭda, troški nieraŭnavažnaj pa abjomach. Vykarystańnie cehły zamiest naturalnaha kamieniu taksama zapatrabavała źmienaŭ — bolš ustojlivaj asnovy z mahutnymi kontrforsami.
Hety nievialiki pomnik architektury — jašče adno paćviardžeńnie mocnaj poviazi biełaruskaj kultury z suśvietnaj.
«Naša Niva» — bastyjon biełaruščyny
PADTRYMAĆ«Nichto ničoha nie kinuŭ i nie źbirajecca». Jak iduć spravy na rekanstrukcyi pałaca Horvataŭ u Naroŭli
Adkul Łanhbard skapiravaŭ prajekt Opiernaha teatra ŭ Minsku?
Usio jašče dumajecie pra Rymskuju impieryju štodnia? Pačytajcie «Historyju Staražytnaha Ryma» Mery Biord
Stalinki, sabory, miačeci. Čym rasijskaja architektura abaviazana Biełarusi
Ciapier čytajuć
«Vyskačyć na vulicu ŭ karotkich spadničkach — heta vy mahli. I ŭsich hvałtavali tam». Łukašenka ŭspomniŭ kinošnikam 2020-y i zaklikaŭ spynicca16
Kamientary