U Vałhahradzie zatrymali biełarusa, padazravanaha ŭ sieryjnych zhvałtavańniach
U Vałhahradzie zatrymali 40-hadovaha mužčynu, jakoha padazrajuć u ździajśnieńni hvałtoŭnych złačynstvaŭ u dačynieńni da maładych žančyn. Jak paviedamlajecca, jon hramadzianin Biełarusi.
6 červienia 2025 hoda ŭ palicyju źviarnułasia žycharka Vałhahrada i paviedamiła, što na čyhunačnaj stancyi «Akvarel» na jaje napaŭ nieviadomy mužčyna i sprabavaŭ ździejśnić seksualny hvałt. Joj udałosia akazać supraciŭ, ale złačynca skraŭ jaje telefon i ŭciok.
Na nastupny dzień, 7 červienia, u palicyju pastupiła jašče adna zajava: u mikrarajonie Tułaka 19-hadovaja dziaŭčyna stała achviaraj seksualnaha hvałtu.
Pa prykmietach padazravanaha byli raspaŭsiudžanyja aryjenciroŭki, a palicyja pačali apieratyŭna-pošukavyja mierapryjemstvy. U vyniku mužčynu zatrymaŭ patrul u Centralnym rajonie horada.
Jak vyśvietliłasia, heta 40-hadovy vychadziec z Respubliki Biełaruś, jaki ŭžo byŭ asudžany za padobnyja złačynstvy pry padobnych abstavinach. Jon znachodziŭsia ŭ Rasii niezakonna.
Asoba, jakaja nadała biełarusu žytło ŭ Vałhahradzie, była pryciahnuta da administracyjnaj adkaznaści.
Pavodle infarmacyi śledstva, zatrymany moža być datyčny da inšych vypadkaŭ seksualnaha hvałtu, u tym liku ŭ inšych rehijonach Rasii, naprykład, u Krasnadarskim krai.
Kamientary