Eks-dyrektar «Biełarusaŭ i rynku» Kanstancin Załatych pracuje na drevaapracoŭcy

Svoj dzień narodzinaŭ 5 lipienia były dyrektar haziety «Biełarusy i rynak» Kanstancin Załatych užo treci raz sustrakaje za kratami. Paśla prysudu jaho nakiravali ŭ papraŭčuju kałoniju № 1 u Navapołack, tam miedyjamieniedžar na siońnia pracuje na drevaapracoŭcy, piša BAŽ.

Nie tak daŭno Kanstancina Załatych pieraviali z atrada № 7 u atrad № 9, adnačasova z hetym źmianiŭsia i rod zaniatkaŭ viaźnia — raniej jon pracavaŭ na pieraborcy polietylenavych hranuł.

Volnaha času ŭ Kanstancina niašmat, telefanavańni rodnym dazvolenyja raz na miesiac, i jany vielmi niepraciahłyja — pa 4—5 chvilin. Listy, jakija jon piša svajakam, časam nie dachodziać, i da jaho traplaje nie ŭsia karespandencyja ad rodnych. Dopisy ad inšych ludziej jamu nie pieradajuć.

Svajaki padličyli, što ŭ źniavoleńni Kanstancinu treba adbyć jašče 16 miesiacaŭ. Blizkija suciašajuć siabie tym, što nastroj u jaho badziory i zdaroŭje zbolšaha nie padvodzić.

***

Minski haradski sud 6 krasavika 2023 hoda pryznačyŭ Kanstancinu Załatych 4 hady pazbaŭleńnia voli z adbyćciom u papraŭčaj kałonii va ŭmovach ahulnaha režymu. Sprava raźbirałasia ŭ zakrytym režymie. Sudździa Alena Šylko ŭ vyniku pryznała jaho vinavatym pavodle čatyroch artykułaŭ Kryminalnaha Kodeksa:

— 369 KK — abraza pradstaŭnika ŭłady;
— 368 KK — abraza Łukašenki;
— 130 KK — raspalvańnie varožaści ci varažniečy;
— 426 KK — pieravyšeńnie ŭłady ci słužbovych paŭnamoctvaŭ.

Apielacyjnuju skarhu miedyjamieniedžara na prysud 4 lipienia 2023 hoda Viarchoŭny sud pakinuŭ bieź źmienaŭ.

Chto taki Kanstancin Załatych?

Byłoha dyrektara haziety «Biełorusy i rynok» razam z kalehami pa redakcyi zatrymali 18 maja 2022 hoda ŭ Minsku. Zatrymańnie pravodzili supracoŭniki Kamiteta dziaržaŭnaj biaśpieki. Paśla dopytu hałoŭnaha redaktara Andreja Aleksandroviča i buchhałtarku Juliju Kachno adpuścili, a Kanstancina Załatych pakinuli pad vartaj.

Pieršapačatkova jamu vystavili abvinavačańnie pavodle častki 2 artykuła 130 Kryminalnaha kodeksa (raspalvańnie varožaści, spałučanaje z hvałtam albo ździejśnienaje słužbovaj asobaj), paźniej śledstva znajšło padstavy dla abvinavačańnia jašče pa niekalkich kryminalnych artykułach.

Załatych pastavili ŭ vinu, u pryvatnaści, vykazvańnie «ŭłasnaj tendencyjnaj pazicyi» na padziei ŭ krainie, što, pavodle śledčych, vyjaviłasia ŭ abraźlivych kamientarach u sacsietkach na adras vyšejšych asobaŭ dziaržavy. Akramia taho, śledstva davodziła, što jon nibyta «metanakiravana karystaŭsia słužbovym stanoviščam» dla vyrašeńnia piersanalnych patreb.

13 lipienia 2023 hoda KDB unios Kanstancina Załatych u śpis asob, datyčnych da «terarystyčnaj dziejnaści». Naŭzdahon, 21 lipienia, MUS uniesła palitviaźnia ŭ pieralik «ekstremistaŭ».

• 0
• 0
• 0
• 0
• 0
• 0
• 1
• 0