«Ja zrazumieła, što nie stamiłasia». U Minskaj vobłaści zdajuć domiki na vadzie za 800 rubloŭ u sutki — kamientatary ŭ šoku
Tyktok-kanał ab padarožžach źniaŭ ahlad na novuju łakacyju dla adpačynku ŭ Šyškach. Ludzi nie razumiejuć, čamu tak doraha.
Kanał belarus360 u tyktoku raspavioŭ pra domiki na vadzie va Uździenskim rajonie. Łakacyja adkryłasia tolki ŭ listapadzie.
Domiki ź vialikimi panaramnymi voknami raźmieščany na bierazie voziera, unutry dva pakoi: na pieršym paviersie haścioŭnia i sanvuzieł, a na druhim — spalnia ź vialikim łožkam.
Pry hetym kuchni i chaładzilnika ŭ domiku niama: jeści pryjdziecca ŭ dvuch restaranach na terytoryi kompleksu. Adpačynak u takim domiku sa śniadankam 800 rubloŭ u sutki. Łaźnia, spa, masaž i aktyŭny adpačynak — tolki za dadatkovy košt.
Doroho ili normalno za takoj otdych?
Videa nabrała ŭžo miljon prahladaŭ i bolš za 2000 kamientaroŭ. Hledačy šakavanyja takoj canoj za domik u Biełarusi.
«Dzietki, vy tam zusim ci što? Za 800 u sutki ja ŭ trochzorkavym hateli na Maldyvach adpačnu».
«Nu ja naohuł nie razumieju, za što takija hrošy? Ni łaźni, ni sauny, ni basiejna! Siadzi i hladzi na markotnaje voziera i čakaj sonca za 800 rubloŭ».
«Prabačcie, ale Maldyvy za 5000 rubloŭ 10 dzion hučać jak byccam lepš».
«1000$ adpačyŭ u Hruzii ceły tydzień na bierazie mora. 800 rubloŭ? Vy žartujecie, heta nierealna doraha».
«Heta značyć troje sutak hetaha markotnaha adpačynku sa śniadankam roŭna pucioŭcy «ŭsio ŭklučana» na mory. Brava, hienijalna».
«Ja zrazumieła, što nie stamiłasia».
Ludzi dzielacca, što za kudy mienšyja hrošy možna źlotać na mora abo adpravicca ŭ polskija hory. Inšyja kamientatary pišuć, što hety dom adpačynku pabudavali vidavočna nie dla prostych biełarusaŭ. A chtości miarkuje, što ŭładalnik prosta vyrašyŭ adbić vydatki za hod.
Darečy, kali vieryć ahrehataru Holiday.by, sapraŭdy možna źlotać na Maldyvy za 5500-6000 rubloŭ na siem dzion, praŭda, u nie samyja lepšyja hateli i z vyletam z Maskvy.
Darečy, miarkujučy pa infarmacyi na sajcie kompleksu, domik na vadzie ŭsio ž kaštuje krychu tańniej — 600 rubloŭ biez PDV. Ale jość u Šyškach prapanova i za 800 rubloŭ — heta ekadom, jaki staić na addaleńni na vostravie.
Kamientary