Z prapanovaj dazvolić biaspłatnuju druhuju sprobu EKA ŭ vypadku niaŭdačy ź pieršaj vystupiła Ministerstva achovy zdaroŭja.
Ab novaj inicyjatyvie raskazaŭ ministr achovy zdaroŭja Alaksandr Chadžajeŭ.
«Ministerstva achovy zdaroŭja płanuje vynieści inicyjatyvu ab razhladzie mahčymaści ŭviadzieńnia normy pra praviadzieńnie dvuch sprob EKA ŭ vypadku, kali pieršaja sproba akazałasia biezvynikovaj. I dać, tak skazać, žančynie druhi šaniec stać maci», — zajaviŭ Chadžajeŭ.
Ciapier dla siamiejnych par, dzie muž i žonka źjaŭlajucca hramadzianami Biełarusi i ŭzrost žonki nie pieravyšaje 40 hadoŭ, adna sproba EKA ŭ dziaržaŭnych klinikach pradastaŭlajecca biaspłatna.
Pa słovach Chadžajeva, za try hady ź biudžetu na hetuju pasłuhu było vydatkavana 17 młn rubloŭ, piša BiełTA.
U Biełarusi taksama viadziecca bank donarskich pałavych kletak, što dazvalaje mnohim param, jakija sutykajucca z prablemami biaspłodździa, atrymać mahčymaść stać baćkami.
Taksama pacyjenty, jakija prachodziać nie pieršaje EKA, mohuć atrymać lhotny kredyt.
Letam Minzdraŭ abmiežavaŭ dostup da pracedury EKA dla niekalkich katehoryj žančyn. Siarod supraćpakazańniaŭ da praviadzieńnia štučnaha apładnieńnia źjavilisia atłuścieńnie druhoj stupieni i bolš, a taksama najaŭnaść transpłantavanych orhanaŭ i tkanak. Akramia taho, EKA nie budzie pravodzicca VIČ-infikavanaj žančynie.
Taksama dla par, jakija žadajuć zrabić EKA, uvodzicca abaviazkovaja kansultacyja ŭ psichijatra-narkołaha.
Kamientary