Lidarka «Alternatyvy dla Hiermanii» zajaviła, što choča dobrych stasunkaŭ z Rasijaj, i nazvała jaje vialikaj dziaržavaj
«My chočam spynić sankcyjnuju palityku, jakaja, pierš za ŭsio, nanosić škodu našaj krainie. U nas samyja vysokija ceny na enierhiju ŭ śviecie».
Lidarka niamieckaj pravapapulisckaj partyi «Alternatyva dla Hiermanii» Alisa Vajdel zajaviła, što choča dobrych stasunkaŭ z Rasijaj, nazvaŭšy jaje vialikaj dziaržavaj.
Pra heta jana kazała ŭ intervju Bild. Nižej uryvak hetaha intervju.
Bild: U svajoj pieradvybarnaj prahramie vy zajaŭlajecie, što chočacie bieśpieraškodna handlavać z Rasijaj, nieadkładna źniać sankcyi i adnavić hazapravody «Paŭnočnaha patoku». Heta aznačaje, što vy hatovyja pieraličvać miljardy režymu, jaki znoŭ i znoŭ zaklikaje da vajny suprać Hiermanii. Voś prykład słoŭ rasijskaha prapahandysta: «Ci nie čas nam znoŭ strasianuć pył z teŭtonskich mahił mahutnym maršam savieckaha bota?» Čamu vy chočacie adpraŭlać hetym ludziam niamieckija hrošy?
Vajdel: My chočam vielmi dobrych stasunkaŭ z našymi jeŭrapiejskimi susiedziami. My taksama chočam vielmi dobrych adnosin ź vialikimi dziaržavami, i da ich adnosicca Rasija. < … > Da niadaŭniaha času my atrymlivali tanny haz z Rasii praz «Paŭnočny patok». My chočam spynić sankcyjnuju palityku, jakaja, pierš za ŭsio, nanosić škodu našaj krainie. U nas samyja vysokija ceny na enierhiju ŭ śviecie. My bolš nie kankurentazdolnyja.
Bild: Čamu vy, jak niamiecki patryjot, nie pryznajecie, što Rasija ŭvieś čas pahražaje Hiermanii vajnoj?
Vajdel: My chočam dobrych stasunkaŭ. A što rabiŭ niamiecki ŭrad apošnija amal try hady ŭ adnosinach da Rasii? My tolki spryjali eskałacyi. Heta adbyvałasia na ŭzroŭni rytoryki, finansavaj dapamohi, a taksama pastavak uzbrajeńniaŭ suprać Rasii. Paśla Druhoj suśvietnaj vajny niamieckija tanki znoŭ iduć suprać Rasii. Heta poŭnaje zabyćcio historyi, kali chočacie viedać majo mierkavańnie.
Bild: Značyć, nivodnaha krytyčnaha słova pra toje, što Rasija pahražaje nam vajnoj. Zafiksavana.
Vajdel: Ale my ž rabili sapraŭdy hetak ža. Frydrych Mierc pahražaŭ pastaŭkami Taurus, rekłamavaŭ hetuju ideju.
Bild: Ale ad vas nivodnaha krytyčnaha słova ŭ adras Rasii? Zafiksavana.
Vajdel: Tak, ale Donald Tramp taksama hetaha nie rabiŭ. Treba sadzicca za stoł pieramovaŭ, treba razmaŭlać adzin z adnym. Ničoha inšaha «AdH» nie kazała — my pavinny ŭstupić u mirnyja pieramovy. Liču, što tolki takaja palityka źjaŭlajecca surjoznaj. Pierš za ŭsio, my pavinny nieadkładna spynić sankcyjnuju palityku, jakaja škodzić nam samim.
Bild: Ale pa-raniejšamu ni słova pra rasijskija pahrozy vajny.
Vajdel: Try hady niamieckaja vajennaja rytoryka nakiravanaja suprać Rasii. Čaho vy čakajecie?
Ciapier čytajuć
Učora Minsk znoŭ zatapiła. Čamu stalica nie hatovaja da daždžoŭ?4
Kamientary