Minzdaroŭja stvaryła kamisiju pa rasśledavańni hibieli 14-hadovaj školnicy ŭ balnicy ŭ Jelsku
Minzdaroŭja pravodzić słužbovaje rasśledavańnie pa vypadku śmierci padletka ŭ Jelskaj CRB, paviedamiŭ žurnalistam načalnik hałoŭnaha ŭpraŭleńnia arhanizacyi miedycynskaj dapamohi Minzdaroŭja Leanid Niadzień.
«U Minzdaroŭi stvorana respublikanskaja kamisija. Hrupaj ekśpiertaŭ viedamstva pravodzicca miedycynskaje słužbovaje rasśledavańnie, vyvučajucca ŭsie materyjały zdareńnia», — skazaŭ Leanid Niadzień.
Pavodle jaho słoŭ, taksama pravodzicca vyvučeńnie ŭsich faktaŭ, vykładzienych u internet-prastory i vyjaŭlenych pracoŭnaj hrupaj na dadzieny momant.
Pra śmierć 14-hadovaj školnicy stała viadoma na minułym tydni. Da taho jak trapić u balnicu, dziaŭčynka čatyry dni była na balničnym — z kašlem i bolami ŭ horle.
16 maja jana išła zakryvać balničny, bo adčuvała siabie dobra, tempieratury nie było. Jana navat paśpieła paviedamić kłasnaj kiraŭnicy, što hatovaja viarnucca da zaniatkaŭ.
Dziaŭčynku supravadžała maci, jany razam daviedalisia: treba špitalizavacca, bo ŭ lohkich byli chrypy. Kala 10-j hadziny ranicy padletka nakiravali ŭ balnicu. Pierad afarmleńniem jana zajšła da babuli, kab sabrać rečy. Prykładna da 11-j hadziny dziaŭčynka była ŭ balnicy.
Pa słovach baćki, u 13:35 baćkam patelefanavali i paviedamili, što dzicia ŭ komie ŭ reanimacyi.
A 17:30—17:40 pryjechaŭ reanimacyjny aŭtamabil z Mazyra, adnak było pryniata rašeńnie čakać śpiecyjalistaŭ z Homiela — jany pryjechali prykładna ŭ 23:30. Jašče za 2,5 hadziny da hetaha (kala 21:00) baćkoŭ papiaredzili, što treba rychtavacca da najhoršaha: u dziciaci nieadnarazova spyniałasia serca.
A 23:50 baćku paviedamili, što dziaŭčynka pamierła.
Kamientary