«Jak byccam jeździła sto hadoŭ»: bresckaja bajkierka pierasieła na furu

Natalla ŭžo dva hady pracuje kiroŭcam-mižnarodnikam u polskaj firmie. I heta nie pieršy raz, kali jana šakavała rodnych i blizkich svaim vybaram. U 18 hadoŭ jana kupiła svoj pieršy matacykł, čym, miakka kažučy, ździviła baćkoŭ.

«Matacykł — majo chobi. Jašče ŭ dziacinstvie ja maryła, što kaliści ŭ mianie budzie matacykł. Tak i atrymałasia, pieršy kupiła ŭ 18 hadoŭ. Potym z hadami mianiała na bolš mahutnyja. Baćki, viadoma ž, byli ŭ šoku. Ale jany viedajuć — jak ja vyrašu, tak i budzie. Z časam užo ŭsie pryvykli», — kaža Natalla.

Pavialičyć

Paśla vučoby na jurysta dziaŭčyna niadoŭha papracavała i vyrašyła źmianić vid dziejnaści. 

— Jak advažylisia pajści ŭ dalnabojščycy, čamu mienavita tudy?

— Paśla pieršaj pracy ja dumała, u jakuju b mnie śfieru pajści. U toj čas usie maje siabry-matacyklisty išli ŭ dalnaboj. Ja padumała, čamu b i mnie nie pasprabavać. Zdała na katehoryju C, potym na Je. Nijakich prablem naohuł nie było, usio zdałosia prosta. Zatym pajechała ŭ Polšču, advučyłasia na «kod 95», atrymała čyp-kartu. I ŭsio, praź miesiac pajšła pracavać pa Jeŭropie dalnabojščycaj.

Pavialičyć

Niejkich składanaściaŭ u navučańni naohuł nie było, jak byccam ja ŭžo jeździła sto hadoŭ. Ja dumała, što maja siamja pastavicca niehatyŭna da taho, što ja vybrała sabie takuju śpiecyfiku pracy. Ale baćki mianie padtrymali.

— A jak mužčyny ŭsprymajuć dziaŭčynu-dalnabojščycu?

— Pakolki ja viadu sacsietki, ja davoli papularnaja asoba. Viadoma ž, uvahi šmat z boku mužčyn. Šmat chto choča pahutaryć, paznajomicca.

— Kudy jeździcie?

— Ja pracuju ŭ polskaj firmie, maršrut u Ispaniju, Partuhaliju. Heta vielmi dobryja maršruty pa Jeŭropie. Pracuju na «štory». Važu techniku, adzieńnie ź Ispanii ŭ Polšču.

Pavialičyć

U kadencyju ja zajazdžaju nadoŭha. Apošniaja kadencyja była piać z pałovaj miesiacaŭ. Ciapier na miažy vielmi vialikija korki, vielmi doŭha čakać, tamu nie zajazdžaju. Viadoma, možna samomu sabie vybirać hrafik pracy.

Časam ja zajazdžaju na dva miesiacy. Pa-roznamu vychodzić. Taksama starajusia sabie vybirać kadencyi, kab na leta ja była doma, tamu što ŭ mianie chobi — matacykł. A jašče ciažka pracavać u Ispanii letam, tamu što tam tempieratura dachodzić da 50 hradusaŭ.

— Jość stereatyp, što dalnabojščyki z-za rula ničoha ŭ toj Jeŭropie i nie bačać. A jak u vas, ci ŭdajecca adpačyć i pabačyć niejkija słavutaści? Dzie byvali?

— Viadoma, heta stereatyp. U nas, jak i va ŭsich, jość vychadnyja. Kali viedaješ, dzie budzie vyhruzka abo zahruzka, možna zapłanavać sabie pajezdku. Naprykład, kali pobač z moram, akijanam. Možna padabrać sabie parkinh, spynicca na vychadnyja i pajechać, albo pajści hladzieć słavutaści. Ja byvała i ŭ Paryžy kala Ejfielevaj viežy, i na Mižziemnym mory, Atłantyčnym akijanie. A ŭ Ispanii i Partuhalii ŭžo praktyčna ŭsiudy była.

Pavialičyć

Pavialičyć

Moža, chtości z dalnabojščykaŭ addaje pieravahu prosta siadzieć u kabinie, ale jość i tyja, chto za aktyŭny ład žyćcia, padarožničajuć. Kožny sam vybiraje, jak pravieści vychadnyja. Uvohule jość mahčymaści, było b žadańnie.

Pavialičyć

— U Polščy i Litvie pracujuć dziasiatki tysiač dalnabojščykaŭ ź Biełarusi. Ich nie biantežyć navat padvyšanaja płata za kamunałku. A jak vy ličycie, čamu moładź idzie mienavita ŭ firmy ES, kali ŭ Biełarusi nie chapaje niekalki tysiač kiroŭcaŭ? Sprava ŭ zarobkach?

— Viadoma, bolš za ŭsio vyrašaje zarobak. A taksama režym pracy i adpačynku. Tamu što na rasijskim kirunku pracavać treba bolš. Kali ŭ Jeŭropie ty dakładna adpracavaŭ svaje hadziny i adpačyvaješ, to ŭ Rasii takoha nie budzie. Zarobki dalnabojščykaŭ u ES ciapier užo, napeŭna, zraŭnialisia z Rasijaj. Na Kitaj, napeŭna, jašče bolš płaciać.

Ja pracuju ŭ Polščy, startuje zarobak ad 78 i da 95 jeŭra za dzień. Hledziačy ŭ jakoj firmie pracuješ, na kantejniery ci na bočcy, uvohule pa-roznamu.

Pavialičyć

— U jakich krainach vam bolš za ŭsio padabajecca jeździć, a ŭ jakich — mienš?

— Bolš za ŭsio padabajecca jeździć u Francyi i ŭ Ispanii. U Francyi tamu, što tam vielmi dobryja parkinhi, jość duš, tualet, usio čysta i akuratna. Infrastruktura na najvyšejšym uzroŭni. Ciažej za ŭsio, napeŭna, u Hiermanii z-za pastajannych korkaŭ, avaryj, ramontaŭ. Nu i parkinhi nie takija jak u Francyi, šumnyja.

— Jakija niezvyčajnyja situacyi byvali?

— Za dva hady surjoznych zdareńniaŭ nie było. Była situacyja, što adčapiŭsia ŭ mianie ad ciahača pryčep. Heta była pałomka siadła, majoj viny nie było. Ale situacyja nie z pryjemnych. Heta było na parkinhu, tam utvaryŭsia zator, pakul adciahnuli ciahač i pryčep. Adna takaja situacyja ź niepryjemnych była, a tak zvyčajna ŭsio dobra.

— Jak charčujeciesia na pracy?

— U dalnaboi ja starajusia charčavacca pravilna, zajmajusia jašče sportam. Tłustaj ježy ja nie jem. Jak praviła, ja rablu zakupki ŭ Ispanii, tamu što ja tam čaściej za ŭsio byvaju. Viadoma ž, u Ispanii vielmi smačnyja sadavina, chamon (ispanski nacyjanalny dalikates, syravialeny śviny kumpiak). Ale, za dva hady ja zrazumieła, što ŭ nas, u Biełarusi, samaja smačnaja ježa.

Pavialičyć

Natalla Kałtunievič

— Vašy parady maładym ludziam, jakija tolki źbirajucca iści ŭ dalnaboj.

— Mnie ŭ sacsietkach časta pišuć i dziaŭčaty, i chłopcy, z pytańniem, z čaho pačać. Ja, viadoma ž, dzialusia paradami. Hałoŭnaje, kali čałaviek vyrašyŭ źviazać svajo žyćcio z hetaj śfieraj, treba adrazu dziejničać. Advučyŭsia na ŭsie patrebnyja katehoryi i pajechaŭ pracavać, a nie raściahvać heta na doŭhi čas. Treba nie bajacca, vieryć, što ty ŭsio zmožaš.

Kali mnie pišuć dziaŭčaty, dumajuć, što nie atrymajecca, heta ciažka. Ale ciapier u Jeŭropie vielmi šmat dziaŭčat jeździć. Hetaja prafiesija ŭžo nie źjaŭlajecca niejkaj niezvyčajnaj dla dziaŭčyny, tamu što nas užo vielmi šmat.

— Jakija płany na budučyniu, što nakont siamji? Pryjdziecca zakinuć dalnaboj ci muža šukać lepš u hetaj śfiery?

— Płany na budučyniu, viadoma ž, buduju. Ja nie źbirajusia pracavać usio žyćcio ŭ dalnaboi, heta na niekalki hadoŭ. Viadoma ž, chaciełasia b mnie pracavać pa svajoj śpiecyjalnaści.

Ci chacieła b ja, kab moj muž byŭ dalnabojščykam? Heta ŭžo jak atrymajecca. Kali jon budzie zarablać stolki ŭ inšaj śfiery, to chaj zajmajecca tym, čym jamu cikava. A jašče za čas pracy ja zrazumieła, što mnie lepš za ŭsio ŭ Biełarusi.

• 8
• 0
• 2
• 1
• 1
• 1
• 0
• 0