Dva pamiežnyja pierachody na miažy Polščy i Biełarusi płanujuć adkryć u siaredzinie listapada
Pradstaŭnik urada Polščy Adam Šłapka paviedamiŭ, što dasiahnuta damoŭlenaść adkryć pamiežnyja pierachody «Kuźnica» i «Babroŭniki» na polska-biełaruskaj miažy «prykładna ŭ siaredzinie listapada», paviedamiła ahienctva PAP.
Pavodle jaho słoŭ, da takoj damoŭlenaści pryjšli premjer-ministr Polščy Donald Tusk i premjer-ministr Litvy Inha Ruhinienie.
Jon dadaŭ, što adkryćcio pamiežnych pierachodaŭ ź Biełaruśsiu płanavałasia ažyćciavić raniej, adnak litoŭski bok u razmovie z premjeram Tuskam uźniaŭ pytańnie napružanaści na svajoj miažy.
U aŭtorak premjer Polščy Donald Tusk zajaviŭ, što ŭ listapadzie na probny pieryjad buduć adkryty pierachody «Kuźnica» (zakryty z 2021 hoda) i «Babroŭniki» (zakryty z 2023 hoda).
Siońnia ministr unutranych spraŭ i administracyi Polščy Marcin Kierviński skazaŭ, što pytańnie adkryćcia pierachodaŭ krychu adkładajecca:
«Za apošnija dva hady ŭrad Donalda Tuska zdoleŭ mocna ŭmacavać miažu, i praces nielehalnaj mihracyi na polska-biełaruskaj miažy ŭziaty pad kantrol. Heta, pa-pieršaje. Pa-druhoje, u nas adkryty pamiežnyja pierachody ź Biełaruśsiu, ale ŭ Lublinskim vajavodstvie. Niekatory čas tamu premjer-ministr znoŭ kazaŭ ab adkryćci novych pamiežnych pierachodaŭ, na hety raz u Padlašskim vajavodstvie. I my, vierahodna, zrabili b heta značna raniej, kali b nie toj fakt, što Litva adnačasova svaje pierachody ź Biełaruśsiu zakryvaje. Litoŭcy — heta našy partniory, my ź imi ŭ kantakcie. Ja razmaŭlaŭ z namieśnikam ministra ŭnutranych spraŭ, i padčas učarašniaj sustrečy ŭ Hdańsku, i siońnia ja budu havaryć pa telefonie. Padtrymajem litoŭcaŭ u hetym rašeńni. Tamu adkryćcio pierachodaŭ u Padlašskim vajavodstvie adkładvajecca na niekalki tydniaŭ, ale rašeńnie tut było pryniata», — skazaŭ jon.
Učora ŭrad Litvy pryniaŭ rašeńnie zakryć miažu ź Biełaruśsiu da 30 listapada, pakinuŭšy mahčymaść pierasiakać jaje ŭ punkcie propusku «Miedniki» tolki dla niekatorych katehoryj asob. Pry hetym členy litoŭskaha ŭrada zajaŭlali, što raźličvajuć na salidarnaje rašeńnie polskaha boku.
Ciapier čytajuć
Zorka brejkdansu ź Viciebska atrymaŭ 11 hadoŭ turmy ŭ Kitai. Što zdaryłasia?4
Kamientary
I što takoje - probny pieryjad? Da pieršaha nielehała (a jany nikudy nie dzienucca)? Ci da momantu NIEvykanańnia damoŭlenaści pa vyzvaleńniu Pačobuta i manacha?