U Biełarusi zajavili pra zaviaršeńnie demarkacyi miažy z Ukrainaj na sušy. U Kijevie adreahavali
Vyniki demarkacyjnych rabot pavinna zaćvierdzić sumiesnaja demarkacyjnaja kamisija, jakaja nie pracuje z 2022 hoda paśla taho, jak Biełaruś padtrymała vajennaje ŭvarvańnie Rasii va Ukrainu, piša «Radyjo Svaboda».
Staršynia Dziaržaŭnaha pamiežnaha kamitetu Biełarusi Kanstancin Mołastaŭ zajaviŭ pra zaviaršeńnie demarkacyi miažy z Ukrainaj na suchaputnym učastku miažy.
«Surjoznuju ŭvahu nadajem praciahu demarkacyi dziaržaŭnaj miažy na ŭkrainskim učastku. Na siońnia my vykanali raboty pa demarkacyi na ŭsim suchaputnym učastku. Zastaŭsia tolki račny ŭčastak miažy pa rekach Dniapro i Sož», — pracytavała Kanstancina Mołastava dziaržaŭnaje ahienctva BiełTA.
Kamientujučy hetu zajavu, u Dziaržaŭnaj pamiežnaj słužbie Ukrainy adznačyli, što Ukraina z 2022 hoda nie pravodzić rabot «pa vyniasieńni linii dziaržaŭnaj miažy na miascovaść i ŭstalavańni pamiežnych znakaŭ na miažy ź Biełaruśsiu».
«Pryčyna hetaha — raźviazanaja Rasijaj vajna i padtrymka jaje Biełaruśsiu, bo ŭvarvańnie ŭ našu krainu adbyvałasia i z terytoryi Biełarusi taksama. Ja nie vyklučaju, što Biełaruś pravodziła niejkija demarkacyjnyja raboty, jakija byli ŭzhodnienyja sumiesnaj ukrainska-biełaruskaj demarkacyjnaj kamisijaj da 2022 hoda, zhodna z sumiesnaj damovaj pamiž krainami ab demarkacyi dziaržaŭnaj miažy», — skazaŭ «Radyjo Svaboda» pres-sakratar Dziaržaŭnaj pamiežnaj słužby Ukrainy Andrej Dziemčanka.
Pradstaŭnik ukrainskaj Dziaržaŭnaj pamiežnaj słužby padkreśliŭ:
«Jakija b raboty ni pravodziła Biełaruś, vyniki demarkacyi dziaržaŭnaj miažy pavinna ŭzhadnić Sumiesnaja kamisija, jakaja składaje apisańnie prachodžańnia dziaržaŭnaj miažy, demarkacyjnuju kartu, pratakoły pamiežnych znakaŭ, katałoh kaardynat pamiežnych znakaŭ i zaklučny pratakoł demarkacyi dziaržaŭnaj miažy. Dalej vyniki rabot pavinny zaćviardžać adpaviedna z unutranym zakanadaŭstvam bakoŭ. Tamu dla taho, kab hetaje pytańnie zapracavała paŭnavartasna, najpierš Biełarusi nieabchodna spynić padtrymlivać krainu-terarystku Rasiju».
Andrej Dziemčanka taksama nie vyklučyŭ, što biełaruski bok ciapier choča vydać za fakt toje, što sa svajho boku ŭsie raboty vykananyja.
«Adnak jašče raz padkreślu, što hetyja raboty ni pra što nie havorać, pakul ich nie zaćvierdzić Sumiesnaja demarkacyjnaja kamisija», — dadaŭ pres-sakratar Dziaržaŭnaj pamiežnaj słužby Ukrainy.
Ahulnaja praciahłaść biełaruska-ŭkrainskaj miažy składaje 1084 kiłamietry. Kab pravieści demarkacyju ź biełaruskaha boku, patrebna było ačyścić kala 760 kiłamietraŭ prasiek, ustalavać try tysiačy pamiežnych znakaŭ, padrychtavać demarkacyjnyja dakumienty.
U traŭni 2021 hoda ŭkrainski bok paviedamlaŭ, što na toj momant 80% linii dziaržaŭnaj miažy pieranieśli na miascovaść i ŭstalavali bolš jak 1,5 tysiačy pamiežnych znakaŭ. Praz pandemiju karanavirusu hetaja dziejnaść zapavoliłasia.
«Mnie kazali: ty z hłuzdu źjechaŭ, jaki pašpart, tut Kijeŭ mohuć uziać!» Biełarus raskazaŭ, jak zhubiŭ va Ukrainie dakumienty i try hady nie moh ź jaje vyjechać
Na miažy z Ukrainaj adkryli novuju pamiežnuju zastavu
Ukrainski vajskoviec znajšoŭ kala biełaruskaj miažy zuby mamanta
Na miažy z Ukrainaj adkryli jašče adnu pamiežnuju zastavu
Kamientary